اسلامي امت د تاریخ په اوږدو کې له ګڼو پېښو او ننګونو سره مخ شوی دی؛ د صهیونیستي رژیم له لوري د اقصی مسجد او د فلسطین د خاورو له اشغال نیولې بیا تر هغو خونړیو او وحشتناکو ناورینونو پورې چې په سوریه، یمن، کشمیر او د اسلامي نړۍ په نورو برخو کې رامنځته شوي دي، اسلامي امت د ډېرو او لویو-لویو پېښو شاهد پاتې شوی دی.
دا ټولې داسې دردوونکې پېښې وې چې نه یواځې د هماغو هېوادونو د ملتونو برخلیک یې بدل کړ، بلکې د اسلامي نړۍ د ټولو ویښو او مؤمنو مسلمانانو پر روحیه یې هم ناوړه اغېز کړی دی.
دا ځکه چې اسلامي امت د قرآن کریم د حکم او د رسولﷺ په لارښوونو د عمل پر بنسټ، یو وجود او بدن دی، چې د یوه غړي درد یې د ټول بدن آرام او سکون له منځه وړي.
که فلسطین ته وګورو، نږدې دوه کاله کېږي چې د غزې مظلوم ولس د صهیونیستي رژیم له لوري نسل کُشي کېږي، په دې دوه کلونو کې لس ګونه زره مسلمانان شهیدان شوي او له سلو زرو ډیر نور ټپیان شوي دي.
په سوډان کې هم مظلوم مسلمانان له وختونو راهیسې د بهرنیو کړیو د قدرت غوښتنې د شخړو قرباني شوي. د هغو نړۍوالو د سترګو په وړاندې چې ځانونه د بشر د حقونو مدافعین بولي، په وینو لمبول کېږي او کورونه یې ورانیږي.
د نورو اسلامي هېوادونو حالت هم تر دې ښه نه دی؛ مسلمانان په خپلو ډېرو ځمکو او هېوادونو کې له بېشمېره ستونزو او کړاوونو سره لاس او ګرېوان دي.
افغانستان چې په خپله له کلونو کلونو راهیسې د اشغال، ظلم او د پردیو دسیسو قرباني پاتې شوی، هیڅکله یې هم د اسلامي امت د دردونو او زخمونو په وړاندې بې پروايي نه ده کړې.
د پرځېدلي جمهوریت پر مهال که څه هم د وخت واکمنو له غرب سره د مطلق تړاؤ له امله، د نورو مسلمانانو د دردوونکي حالت په اړه د تبصرې توان نه درلود، خو اوس چې جمهوریت پرځېدلی او یوه خپلواکه واکمني رامنځته شوې، وضعیت له پخوا څخه بدلون کړی دی.
د جمهوریت له پرځېدو او د سرپرست حکومت له راتګ راهیسې، د افغانستان د سرپرست حکومت چارواکو په خپلو ویناوو، اعلامیو او رسمي دریځونو کې په ځلونو د فلسطین، سوریې او د نورو مظلومو اسلامي هېوادونو له ملتونو سره خپله ژوره همدردي، خواخوږي او تړاو څرګند کړی دی.
د سرپرست حکومت مسؤولینو همېشه د اسلامي امت پر یووالي او د الهي دین د مقدساتو د دفاع پر اړتیا ټینګار کړی او په زغرده یې ویلي، چې د قدس آزادي، له تپل شویو جګړو د اسلامي هېوادونو خلاصول او له مسلمانانو څخه د روان ظلم لیرې کول، د ټولو مسلمانانو ګډ آرمان دی او افغانستان هم ځان د دې لوی آرمان شریک ګڼي.
له شک پرته او د مغرضو رسنیو د تبلیغاتو برعکس، افغانستان نه د اسلامي امت د قضیو په اړه بې پرې پاتې شوی او نه بې احساسه؛ بلکې له شته امکاناتو سر سم، همېشه یې په مسؤولانه توګه د مسلمانو ملتونو تر څنګ ولاړ دی.
آن تر دې چې په نړۍوالو محفلونو کې هم د افغانستان استازو د مظلومو ملتونو له حقونو څخه دفاع کړې او د اسلامي امت د عدالتغوښتنې غږ یې د نړۍوالو تر غوږونو رسولی دی.
په پوره ډاډ سره ویلای شو، چې افغانستان د ستر اسلامي امت یوه نه بېلېدونکې برخه ده؛ داسې یو ملت چې په خپله یې هم د اشغال او توطئې خوند څکلی، د نورو مسلمانانو درد په ټول وجود سره احساسوي او په دې لاره کې یې خپل دیني عهد نه دی هېر کړی.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.