یو شمېر رسنیو د ایران د بشري حقونو سازمان له قوله خبر ورکړی، چې د یوه افغان په ګډون څلور بندیان د ایران د شېراز په مرکزي زندان کې د اعدام له پاره یوې انفرادي خونې ته لېږدول شوي دي.
دغه سازمان پرون شنبه د ثور په ۲۹ مه نېټه خبر ورکړی، چې دغه څلور کسان د مخدره موادو د کاروبار یا هم د قصدي قتل په تور اعدام ته چمتو کړای شوي دي.
دغه سازمان وایي، چې افغان وګړی د مخدره موادو په تور نیول شوی، چې ممکن ډېر ژر له درېیو نورو بندیانو سره یوځای د اعدام حکم ورباندې تطبیق شي.
د ایران د بشري حقونو سازمان وايي، په ۲۰۲۳م کال کې د ۲۰۲۲م کال پر تله د مخدره موادو په تور د اعدامونو شمېر ۸۴ فیصده زیات شوی دی.
په ۲۰۲۳م کال کې په دې تور د افغان وګړو په ګډون لږ تر لږه ۴۷۱ کسان په ایران کې اعدام شوي، خو په ۲۰۲۲م کال کې یې شمېر ۲۵۶ وو.
په ایران کې د محاکمو پر جریان د بشري حقونو ملاتړو ډلو انتقاد کړی، چې په وینا یې شفافیت په کې کم دی.