د رعب او وحشت جوړول
بل عامل چې بغاوتګران یې لا یاغي کول او د دوی د غرور او کبر طبل ته یې زور ورکاوه، په ټولنه کې د رعب او وحشت جوړول او د خلکو په زړونو کې وېره خپرول وو.
دا ناپاکه ډله، چې د ریښتیني انساني عقل او منصفانه دیني لید له نعمت څخه محرومه وه او په داسې چاپېریال کې روزل شوې وه چې له دغو ارزښتونو سره په تضاد کې وو، ضمیرونه یې وچ شوي وو او د سم کار د ترسره کولو پر ځای، د وضعیت لا خرابول او د بېوزلو او بېچاره خلکو په ژوند کې یې وېره او رعب لا ډېرول.
ټولنه د داسې بېنظمه خلکو لپاره د ښکار میدان ګرځېدلې وه، چې هر وخت به د بېوزلو او اندېښمنو خلکو څخه یو څوک د دوی د تمسخر او اذیت په جال کې نیول کېده او د لنډ وخت لپاره به یې د دوی لخوا د وخت تېرولو او بېعزتۍ له امله کړاونه او رنجونه زغمل.
په داسې حساسو او زړهبوږنوونکو حالاتو کې نه امنیتي ځواک څه کولی شوای او نه خلکو د مداخلې او مخنیوي توان درلود؛ ځکه دوی ښه پوهېدل چې دغه ډول خلک له لوړپوړو سره تړاو لري او هر ډول مداخله او دخالت د دوی نیول، په خپله د ستونزو سره مخامخ کېدل په بر کې لري.
د ټولنې وضعیت همېشه د دغو خشنو خلکو په شتون کې په همدې ډول روان وو، او داسې ښکاره کېده چې ژوند یوازې د همدې خلکو او د دوی سره تړلو خلکو لپاره خوندور او خوږ دی، او نور د ارام ژوند کولو حق نه لري.خو د ټولنې بېوسه خلک له خپلو حقونو څخه په عادلانه ډول محروم وو او په ګډوډۍ او وارخطایۍ کې ژوند کاوه، او هېڅ داسې اداره نه وه چې وضعیت بیرته خپل اصلي مسیر ته راوګرځوي او چارې سمبال کړي.
دا حالت د ګډوډۍ په ډېرښت کې لا زیادت کاوه او هره ورځ به خبري شبکو داسې ځورونکي خبرونه خپرول چې کوم دولتي چارواکی یا پارلمان وکیل د خلکو په مخ کې او په کوڅو کې د کوم ټرافیک مامور یا کوم کسبهکار له سپکاوي سره مخ کړی او وهلی یې دی.
خو دا خبرونه نه د عاملانو د تعقیب لپاره، بلکې د خلکو په زړونو کې د لا زیاتې وېرې د خپرولو او له داسې متکبرې ډلې سره د شخړې د نه کولو د تشویق په موخه خپرېدل.
کله چې داسې نا انډوله او ظالمانه کړنې په ټولنه کې او له دولتي او خصوصي رسنیو څخه خپرېدې او قانوني تعقیب موجود نه وو، نور خلک چې په پټه او خاموشۍ کې وو، هم هڅول کېدل چې په عام محضر کې د خلکو د بېعزتۍ او شورماشور کولو سره ځان وښیي او د عادي خلکو مخونه په څپېړو سره وساتي.
تل یو له هغو دلایلو څخه چې انقلابونه او د خلکو پاڅونونه ګړندي کوي، د نورو دیني او جهادي دلایلو او د یرغلګرو د ایستلو ترڅنګ، د همدې زورواکو او ظالمو کسانو ظلمونه دي، چې د خپلو وطنوالو لپاره یې ژوند ستونزمن کړی وي.
الحمدلله، نن ورځ د داسې بغاوتګرانو او متکبرانو ریښې په افغانستان کې وچې شوې دي او ټول خلک د شریعت قانون په وړاندې برابر دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.