د افغانستان بانک مسوولین وايي، د ۱۴۰۲ کال په اوږدو کې یې ۵.۲ مېلیارده افغانۍ زاړه بانک نوټونه سوځولي دي.
له یاد بانک څځه په خپره شوې خبرپاڼه کې ویل شوي، د پرو سږکال په اوږدو کې د افغانستان بانک د مُندرسو بانک نوټونو سوځولو او هېوادوالو ته د نوو بانک نوټونو برابرولو په برخه کې اغېزمن اجراات کړي دي.
د خبرپاڼې له مخې، په دې موده کې د شاوخوا ۵.۲ مېلیارده افغانیو په ارزښت زاړه بانک نوټونه په مرکز او نورو ولایتونو کې راټول او سوځول شوي دي او له پولي گردښت څخه ایستل شوي دي.
په خبرپاڼه کې ویل شوي، په بدل کې یې د معقولو پولي سیاستونو په پام کې نیولو سره خلکو ته نوي بانک نوټونه وېشل شوي، تر څو د راکړې ورکړې لړۍ په اسانۍ سره دوام وکړي.
د افغانستان بانک د راتلونکي او اوسني کال لپاره له خپلو خلکو غوښتي چې د افغاني بانک نوټونو سمې ساتنې ته پاملرنه وکړي ، تر څو له ژر زړېدو څخه یې مخنیوی وشي.
یاد بانک په یوې بلې خپره کړې اعلامیه کې ویلي، د ۱۴۰۲ ل کال په اوږدو کې د افغانستان بانک د معقولو پولي سیاستونو د طرحه کولو او اجرا کولو له لارې وتوانېد تر څو د افغانۍ د ارزښت ساتنې او په مطلوب حد کې د انفلاسیون د نرخ کنټرولولو په برخه کې د پام وړ لاسته راوړنې ولري.
اوسمهال د افغانۍ د نړۍ یو له تر ټولو باثباته پولي واحدونو څخه ده او ارزښت یې د نوو پولي واحدونو په پرتله زیات دی.
د افغانستان بانک د معلوماتو پر بنسټ، په تېرو ۱۵ کلونو کې یې ۶۵ مېلیارده افغانۍ سوځولې او لا هم هر کال تر پینځو مېلیاردو ډېرې افغانۍ سوځوي.
د بانکي چارو کارپوهان وايي، د افغاني بانک نوټونو د ژر زړېدو لاملونو څخه په بازار کې د نغدو پیسو ډېر چلښت، د ورکړې د برېښنايي سیستمونو او اعتباري کارتونو نه کارول او یا پرې باور نه کول، د پیسو په شمېرلو کې د یو شمېر هېوادوالو ناسم چلند یا بې پروايي او د بانکونو پر ځای په کورونو کې د پیسو ساتل بلل کېږي.
د دوی په خبره، زموږ هېوادوال له پیسو سره هغسې چلند نه کوي، چې باید ویې کړي.
دلته که د چا لاسونه په رنگ وي، غوړ وي یا هم لانده وي پیسې پرې اخلي، خلک په نوټونو لیکل کوي چې دا پیسې ډېرې خرابوي.
د افغانستان بانک له هېوادوالو غوښتي، چې د بانک نوټونو د ښې ساتنې په برخه کې خپله ملي دنده اداء کړي او پیسې دې په جېبي بټوو کې وګرځوي.