د هند بهرنیو چارو وزارت ویاند «رندهیر جېسوال» وایي، دغه هېواد هڅه کوي چې د افغانستان له خلکو سره د بشري او پراختیایي همکاریو پر بنسټ تعامل ته دوام ورکړي.
د هندوستان ټايمز رسنۍ د راپور له مخې رندهیر جېسوال په یوه خبري غونډه کې هندي چارواکو سره د اسلامي امارت د چارواکو کتنو په ځانګړې توګه متحده عربي اماراتو کې د بهرنیو چارو وزارت له سرپرست، مولوي امیرخان متقي سره د هند بهرنیو چارو وزارت د مرستیال کتنې په اړه د یوې پوښتنې په ځواب کې ویلي، دا یې د افغانستان له سرپرست حکومت سره په لوړه کچه تعامل دی او زیاته کړې یې ده چې موخه یې له افغانانو سره د اوږدمهاله اړیکو پیاوړتیا ده.
جېسوال د هند کرېکټ په غوره لیګ کې د افغان لوبغاړو لوبېدو ته په اشارې زیاته کړې چې، هند دغه راز د ورزش په برخه کې هم له افغانستان سره د اړیکو پراختیا غواړي.
جېسوال ویلي: « موږ دغه راز غواړو چې د ورزش په برخه کې هم ډېر څه وکړو، تاسو به لیدلې وي چې، ډېر شمېر افغان لوبغاړي دلته په ای پي ال (هند غوره لیګ) کې لوبیږي او د ګریټر نویډا کرېکټ لوبغالی هم افغانستان ته ځانګړی شوی دی. دا ټولې هغه برخې دي چې، موږ غواړو خپلې اړیکې پکې پیاوړې کړو.»
د يادونې وړ ده چې څو ورځې وړاندې د افغانستان د بهرنيو چارو وزارت د وزير مولوي اميرخان متقي په مشرۍ يوه لوړ پوړي پلاوي د هند د بهرنيو چارو وزارت د مرستيال په مشرۍ پلاوي سره په دوه اړخيزو همکاريو خبرې وکړې.