په نږدې تېرو ورځو کې د افغانو معترضو مېرمنو په نوم ۲۳ ډلو په یوه لیک کې د امریکا له ولسمشر ډونالډ ټرمپ څخه غوښتنه کړې وه، چې د افغانستان لپاره د دې هېواد پخوانی استازی زلمی خلیلزاد محاکمه کړي؛ معترضو ښځو ویلي، چې د خلیلزاد له وجې طالبان واک ته ورسېدل او طالبان زموږ حقونه تر پښو لاندې کوي.
خو دوی دا له یاده ویستلي دي، چې تل د نړۍوالو قدرتونو عملي سیاستونه له اعلان شویو ارزښتونو سره په ټکر کې وي. سیاستونه د شعارونو تابع نه، بلکې د ګټو تابع وي. قوي هېوادونه اصول اعلانوي، خو ګټې تعقیبوي. د ابر قدرتونو ژمنې د اړتیاوو تر وخته اعتبار لري. د قدرت لوبې د اخلاقو شعارونه تر پښو لاندې کوي. پر نړۍوال سټېج حاکم خلک هغه څه کوي چې ګټور وي، نه هغه چې عادلانه وي.
امریکا د خپل تاریخ تر ټولو اوږد جنګ، چې شل کاله یې دوام وکړ، د خلیلزاد تر شخصي سیاست څنګه او ولې قرباني کړي، خلیلزاد افغاني الأصله امریکایي دی، هغه د افغانستان یا طالبانو ګټې نشي تعقیبولی، خلیلزاد د قطر په مزاکراتو کې د امریکایانو د لوبې یوه برخه و، نه لوبغاړی؛ هغه صرف د امریکایانو اجنډاوې مخ ته وړلې. نن هم افغانستان ته د هغه راتګ د یوه امریکايي راتګ و، نه د یو افغاني؛ نن د هغه په راتګ کې د امریکا ګټه وه، خو که سبا يې په خلیلزاد پورې تړلې ګټې تحقق ومومي، هغه به هم د یو عادي کس په څېر پر تش میدان پرېږدي.
پر افغان مېرمنو د افغانستان په داخل کې چا دومره مجبوریت نه دی راوستلی، چې د ټرمپ په شان یو پردي ولسمشر ته د مرستې لاس وغځوي، بلکې دا څو پلورل شوې پروژه يي ښځې دي، چې د څو پيسو په خاطر يې خپل عزت او آبرو شاته پرې ايښي دي.
امريکايانو تل خپلو ګټو ته کتلي، ښه بېلګه یې د امریکا غږ او آزادي راډیو بندول دي. د امریکا حکومت ته، د امریکا غږ راډیو خبریالانو هم یو شکایت لیک استولی دی، مګر دا یوه ناکامه هڅه ده، ځکه امريکايان خپلو ګټو ته ګوري، تر کومه یې چې یې ګټه ورته لرل کار یې ترې واخیست، مګر نن يې چې ګټې پای ته ورسېدې، آزادي او امریکا غږ رادیوګانې یې بندي کړې او هغه کارکوونکي چې لسیزې، لسیزې یې د امریکا د ګټو په خاطر د خپل هېواد او ژبې پر وړاندي دښمنۍ ته کار ویلی و، د خپل دین، کلتور او تاريخ د مسخه کولو په پار یې شپه او ورځ خولې تویولې، له دندو ګوښه او بې سرنوشته کړل.
د نوې ستراتېژۍ له مخې امریکا کوښښ کوي سرپرست حکومت ته ځان نږدې کړي، ځکه په دې کې یې ګټه ده، هغوی ته خپلې ګټې دومره مهمې دي، چې پرته له دریم ګړي هېواد مستقیماً له سرپرست حکومت سره خبرو او تعامل ته کېني او د حکومت د لوړ پوړو چارواکو پر سر نغدي جائزې لیرې کوي، هغه سرې کرښې چې امریکایانو د خپل سیاست له مخې رسم کړې وې، پر ټولو یې پښه کېښوده او وړاندې راتېر شول.
د دې نوي پړاو پرانیسته، د سرپرست حکومت د متوازن سیاست پایله ده چې له ټولو لیرې او نږدې هېوادونو سره نېک تعاملات غواړي او له مخې یې خپله بهرنۍ پالیسي عیار کړې ده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.