د ټرمپ په اداره کې د امریکايي شتمن شخص، ایلن ماسک د حضور پر ضد بیا لاریون شوی دی.
په واشنګټن کې سلګونه کسان واټونو ته وتلي او د امریکا د ولسمشر، ډونالډ ټرمپ په اداره کې یې د ایلن ماسک پر حضور او د ډېر واک ورکولو پر ضد لاریون کړی دی.
لاریون کوونکي له کانګرس غواړي، چې په دغه موضوع کې مداخله وکړي او د ښې حکومتولۍ په برخه کې د ټرمپ د سلاکار، ایلن ماسک د ډېر واک اخیستو پر ضد غږ پورته کړي.
ايلن ماسک، چې د ټرمپ له انتخاباتي کمپاين سره یې ميليونونه ډالره مرسته کوله، واک ته د ټرمپ له رسېدو وروسته د امريکا ولسمشرۍ ادارې د څار او کارګردګۍ رييس ټاکل شوی چې په لوړه کچه واکونه ورکول شوي.
ورته وخت د ټايمز ورځپاڼې په يوه عنوان کې له سپينې ماڼۍ سره د ايلن ماسک انځور ډيزاين کړی او د امريکا اصلي ولسمشر او اداره کوونکی یې بللی دی.