د هرات ولايت مقام د يوې خبرپاڼې په خپرولو سره وايي چې په هرات کې د پاکستان سرکونسل او د دغه هېواد سوداګریزې اتشې کوثر علي زاهد د هرات له والي شیخ مولانا اسلام جار سره په کتنه کې پاکستان کې د افغانستان پر تازه مېوو او سبزيجاتو د ګمرکي تعرفې له صفر کېدلو خبر ورکړی.
خبرپاڼه زياتوي وچې په کتنه کې زاهد ویلي، پاکستان کې د افغانستان تازه مېوو او سبزیجاتو په ځانګړې توګه انارو، انګورو، شفتالو او د رومیانو په وارداتو ګمرکي تعرفه صفر شوې.
د خبرپاڼې پر اساس د هرات والي بیا پاکستان کې د افغانستان پر تازه میوو او سبزیجاتو د ګمرکي تعرفې صفر کېدو هر کلی کړی او دغه کړنه یې د دوه اړخیزو اړیکو د پیاوړتیا لپاره مهم ګام بللی.
پاکستان د افغانستان پر سبزيجاتو او مېوو د تعرفې د صفر کېدو داسې مهال ورکوي، چې دوه ورځې وړاندې د هيواد سياسي مرستيال مولوي عبدالکبير پاکستان ته ګوتڅنډنه کړې وه چې که چېرې افغانستان سره د سوداګرۍ د ستونزو پر حل فکر ونه کړي، نو ډېر ژر به له ياد هېواد سره سوداګري صفر او بديل لارې به ورته پيدا کړي.