په افغانستان کې د ظاهر شاه تر ګوښه کېدو وروسته، د سیاسي قدرت د ترلاسه کولو لپاره د ائتلاف جوړونې نوې بڼه خپله کړه او له هماغه پیله یې د څو اړخیزتیا او خیانت له امله نه يواځې دا چې ملي ګټې ونه شوای ساتلای، بلکې د هېواد فضا يې داسي کړکېچنه کړه، چې د دوامدارو جګړو او نا ارامیو لامل شوه.
ائتلافونه د دې لپاره جوړېږي چې پياوړي شخصیتونه سره را ټول کړي او د بلې ډلې پر وړاندې مقاومت وکړي، یا په دې معنی چې د يوه هېواد ملي ګټې وساتي او تر ټولو زیات کار د ملتونو د وحدت لپاره وکړي، خو په افغانستان کې دا پديده په نوې بڼه له را ښکاره کېدو راهيسې تباه کوونکې او چپه روانه ده.
په افغانستان کې ائتلافونو ته شامل اعضاء هر یو یې د خپلو شخصي اهدافو د ترلاسه کولو لپاره یا خو په يوه ځانګړي هېواد يا جریان پورې ځان تړي، چې له کورنيو جګړو څخه نيولې بيا د بهرنيانو تر يرغلونو پورې د همدې ائتلافونو پيداوار دي.
په افغانستان کې د ائتلافونو جوړېدل او بیا ناڅاپي او ژر وېش نه له هماغه اوله پيله د بېلګو شمېر لري او نه هم داسې شوي چې علتونو دې يې له يو بله زیات توپير لرلی وي.
بې اعتمادي، شخصیت محوري، له واقعيتونو فاصله او امتیاز غوښتنه ټول داسې موضوعات دي چې آن تر ټولو پیاوړي تړونونه یې له منځه وړي او د بې وفا شراکتونو د لغوه کېدو شرم يې هر ځل د ائتلافونو اعضاوو ته ور په غاړه کړی دی. د پرځېدلي جمهوريت پر مهال چې به هر ځل ټاکنې ترسره کېدې، نو مخکې له دې چې ائتلافیانو ته څوکۍ او امتیازات وټاکل شي، ګټونکي ولسمشر به هره ورځ د خاین، نا اهله او غدار کنځلې هضمولې، خو د امتيازاتو تر ورکولو وروسته به بیا هره ورځ د ولسمشر بوټان د برس پر ځای د ائتلافيانو ژبو پاکول.
په ياده مجازي غونډه کې ټولو ګډونوالو د سرپرست حکومت پر وړاندې د مقاومت محکم تعهدونو وکړل، خو دا چې له دې او هغه ځايه مړي نه سره کېږي او په دې فورم کې ګډونوالو د خپلو مخکينو خيانتونو له امله يو ټکی ولسي ملاتړ نه درلود، نو د مقاومت دعوه يې له پیله شړېدلې ښکارېده.
تازه چې يو بل شرم ور په برخه شوی، هغه د مقاومت او آزادۍ خيالي جبهو بې زاري او د صلاح الدين رباني وچ انکار دی، دوی ټولو شاتګ کړی او د دې اجماع په هيڅ راز تصاميمو کې يې شامليت نه دی منلی.
که د پايلې په شکل دا خبره ور اضافه کړو، چې په افغانستان کې د فرد محورۍ، بې اعتمادۍ او له واقعيتونو سره په واټن کې هيڅ ائتلاف تر اوسه نه دی بريالی شوی، چې غدر يې کړی نو غدر ورسره شوی، خيالي جبهې او رباني دې د ژغورنې ملي اجماع ته ویښ وي، ممکن خپل وار واخلي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
