د جمهوریت له پرځېدو سره سم، د ۲۰۲۱م کال د اګست له ۱۵مې وروسته د شر او فساد مخکښانو او لارویانو، له هېواد بهر د طالبانو په ضد، په ټولنیزو رسنیو کې تر بېلابیلو نومونو لاندې رسنیز ادرسونه را منځ ته کړل، پر دغه ادرسونو یې بسنه ونه کړه، بلکې ټولیزې(انځوریزې او غږیزې) رسنۍ یې ایجاد کړې، تر څو په پراخه کچه د طالبانو په ضد ناسمه ذهنیت جوړونه وکړي، د افغان ولس رواني امنیت اخلال او شخصي ګټې ترلاسه کړي.
اجیرې رسنۍ چې اوس مهال له هېواد بهر د بغاوتګرو، شر او فساد په ګټه نشرات کوي؛ له کره اسنادو او شواهدو پرته، د څو پیسو په تمه د طالبانو په زندانونو کې د جنسي تېریو د قضيو دروغ داستانونه تر لیدونکو او لوستونکو رسوي، دوی د ژورنالیزم ټول اصول مات کړي او نه تنها دا چې د بې طرفۍ اصل نه مراعتوي، بلکې د مادي ګټې په حرص کې د هېوادوالو شخصي حریم نقضوي.
په عربي ژبه کې ژورنالیزم ته صحافت وايي، همدا راز خبریال ته صحافي وي؛ صحافت له هغه سپېڅلو صحیفو څخه اخېستل شوی، چې د الله جل جلاله له لورې پر پېغمبرانو نازلې شوې وي، ځکه چې په هغه کې کمي او کاستي نه وي او ټول په کې حقیقت رانغښتی وي.
بهر مېشتې مخالفې رسنۍ چې موخه یې د عامه اذهانو تخریبول دي، داسې موضوعات خپروي او انعکاس ورکوي، چې اصلاً واقعیت نه لري او خیالي وي. په یادو داستانونو کې یو داسې جهت حتماً یادوي، چې حضور نه لري، تر څو خپل ځواب او سپیناوی وړاندې کړي، بلکې همېشه یو طرف وي؛ پر شخصي حریم دغه تېری د ژورنالیزم له ټولو اصولو سره په ټکر کې ده.
بغاوتګر او د دوی د رسنیو کارمندان د خپلو شخصي موخو د ترلاسه کولو له پاره، د بېلابیلو افرادو شخصیت وژنه کوي، توهین امېزه الفاظ ورته کاروي او په خیالي تورونو یې عزتونه لوټي. دا چې له رسنیو خپرېدونکي ټول پیغامونه پر رواني وضعیت تأثیرات لري، له همدې امله دغه دروغجن تورونه په ټولنه کې د کرکې، نفرتونو او بې باورۍ را ټوکولو ته لار هواروي.
رسنۍ باید د څلورو اهدافو لپاره کار وکړي، لکه تعلیم ورکول، تفریح برابرول، رهبري کول او اطلاع رسونه؛ خو د شر او فساد رسنۍ برعکس د دې په ضد وحشیانه انځورونه، دروغجن اطلاعات او له فحشا ډکې خپرونې وړاندې کوي، چې له امله یې عامه اذهان مغشوش کېږي.
د شر او فساد د لارویانو رسنۍ د خپلو پوچو تبلیغاتو ترڅنګ، تر ډېره هڅه کوي چې غربي کلتور او فحشا په افغانانو کې ترویج کړي، دغه هڅه یې د شل کلن جمهوریت پر مهال هم د هېواد په داخل کې د مبتذلو سریالونو او فلمونو په خپرولو کې کول او لا هم د دغسې سریالونو په خپرولو خپل لیدونکي زیاتوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.