د هندوکشغږ د خپلو باوري سرچينو څخه معلومات ترلاسه کړي چې د مقاومت جبهې مشر احمد مسعود په پام کې لري چې له مشهد څخه تهران ته سفر وکړي، څو هلته د صلاحالدین رباني او یو شمېر نورو سیاسي څهرو سره وګوري. دغه سفر په داسې حال کې ترسره کېږي چې د یادې جبهې دننه اختلافات، مشرتابه ته د نهرضایت احساس او د تمرکز نشتوالی ورځ تر بلې زیاتېږي.
سرچینې زیاتوي چې احمد مسعود هڅه کوي د بهرنیو تماسونو له لارې یو ډول سیاسي ساه پیدا کړي، خو د جبهې د غړو تر منځ د نظرونو اختلاف، د اعتماد کمښت او د عملي پلان نشتون د دې ډلې مخه نیولې. همداراز د دوی د غړو دربدري، د امکاناتو کموالی او د اعتماد وړ لارې نهلرل، د دې هڅو اغېز ډېر محدود کړی.
سیاسي شنونکي باور لري چې دا ډول سفرونه ښيي چې د جبهې مشرتابه لا هم د یوه واضح او منسجم مسیر په لټه کې دی، خو له داخلي ستونزو، ګډوډ جوړښت او د عامو خلکو د بې باوري ترڅنګ، دا هڅې تر ډېره د نوم او تماس تر کچې محدودې پاتې دي.
د یادونې وړ ده چې څو ورځې وړاندې هندوکشغږ داسې معلومات خپاره کړي وو چې په ترڅ کې یې څرګندېږي، د محقق په مشرۍ ايران ته د مقاومت شوری د پلاوي سفر د دې شورا دننه ژور اختلافات راولاړ کړي دي. سرچینو ښودلې وه چې په دې سفر کې د احمد مسعود نږدې او وفادار کسان په قصدي ډول له پامه غورځول شوي او له ايران مېشتو هغو غړو سره هم هېڅ ډول همغږي نه ده شوې. له دغو کسانو څخه حضرت علي چې ځان د مشرقي شورا مسؤول بولي، له دې بهیر څخه سخت ناخوښ ښکاري او يونس قانوني ته یې خپله ژوره ناراضګي څرګنده کړې. نوموړي ګیله کړې وه چې نه یوازې له جریانه بېخبره ساتل شوی، بلکې دا کار یې د نورو قومندانانو تر منځ مسخره ګرځولی او شخصیت یې ټیټ کړی دی.
د هندوکشغږ له معلوماتو سره سم، حضرت علي اوس د مقاومت شوری په چوکاټ کې د خپل غړيتوب په اړه د تجدید نظر نیت لري او د نوموړي د ملګرو په منځ کې د هغه پر شخصیت هم شکونه پیدا شوي دي. دا کړکېچ له هغه تصمیم سره تړاو لري چې مقاومت شوری د احمد مسعود له ملي مجمع څخه تر پرېکون وروسته نیولی، ترڅو هغه او نږدې کسان یې نور د شورا له سیاسي لوریو څخه بهر وساتي. اختلافات تر دې حده رسېدلي چې احمد مسعود اوس غواړي یوازې په افغانستان کې د سرپرست حکومت پر وړاندې مبارزې ته دوام ورکړي، خو مقابل جهت نوموړی کشر، بې تجربې او مغرور بولي، چې د دوی په اند نه شي کولای په یوازیتوب سره بریالی سیاسي لوری جوړ کړي.