یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
ازبکستان د افغانستان په شمال کې له مهمو ګاونډیو هیوادونو څخه دی؛ دواړه هیوادونه له یو بل سره اوږدې تاریخي، کلتوري، سیاسي او اقتصادي اړیکې لري.
د جمهوري نظام پر مهال ازبکستان له مشهور مفسد او د یرغلګرو ملاتړي عبدالرشید دوستم سره نږدې اړیکې درلودلې.
د افغانستان په شمال کې افغان-ازبکان یوه له لویو ډلو ده؛ په تېر کې د ازبکستان په ګډون ځینو حکومتونو په افغانستان کې د خپلو ګټو د خوندي کولو له پاره تر ډېره د قومي/ایتنیکي کارت څخه استفاده کوله.
هغو حکومتونو به په افغانستان له قومی/ایتنیکي ډلو سره اړیکې نیولې او په دې ډول به یې په افغانستان کې د نفوذ ترلاسه کولو هڅې کولې، خو د ا.ا.ا له واک ته رسېدو سره هر څه بدل شول.
کله چې ا.ا.ا واک ته ورسېد، نو قومي او سمتي سیاستونو خپل ځای ملي سیاست ته پرېښود او هر څه ته له ملي تناظر څخه کتل کېدل پیل شول.
نور په افغانستان کې بهرنیو هیوادونو له اشخاصو او قومونو/ایتنیکي ډلو څخه د خپلو ګټو د تامین له پاره استفاده کول بند کړل.
ازبک دوستم هم یو له هغو کسانو څخه و چې افغانستان کې یې د ازبکستان د ګټو له پاره هلې ځلې کولې، خو کله چې دوستم فرار وکړ او ازبکستان په افغانستان کې بل څوک و نه موند، نو د خپلو ملي ګټو له پاره یې د دوستم ملاتړ پرېښود.
ازبکستان دوستم ته د اوسېدو ځای هم نه دی ورکړی؛ هغه اوس د یو فراري په څېر په ترکیه کې اوسېږي.
افغانستان او ازبکستان په تېرو کلونو کې یو بل ته ډېر نږدې شوي دي؛ د ازبکستان د بهرنیو چارو وزیر لومړنی بهرنی لوړ پوړی دیپلومات و چې د ا.ا.ا د واک په لومړیو کې یې کابل ته سفر وکړ.
دغه راز، تېره میاشت د ازبکستان لومړی وزیر هم کابل ته راغلی و چې دا د ا.ا.ا په واکمنۍ کې تر ټولو لومړنی بهرنی لوړ پوړی چارواکی و چې کابل ته سفر کوي.
ازبکستان له چین او عربي اماراتو وروسته درېیم هیواد شو چې د ا.ا.ا د سفیر باور لیک یې ومانه.
د افغانستان او ازبکستان تر منځ سوداګري لوړې کچې ته رسیدلې او ازبکستان د افغانستان په ډېرو پروژو پانګونه کوي.
د سوداګریزو اړیکو سربېره ځینې امنیتي مسایل هم شته چې ازبکستان یې افغانستان سره نږدې اړیکو لرلو ته مجبور کړی دی.