د ايران ايسنا خبري اژانس په خپل يوه راپور کې ليکي چې هارتز اسرائيلي ورځپاڼې د متقاعد اسرائیلي جنرال اسحاق بريک یوه مقاله خپره کړې، چې پکې بريک خبرداری ورکړی چې د حماس او د لبنان د حزب الله غورځنګ پر ضد د جګړې دوام به، اسرائیل په یو کال کې تر سقوط رسوي.
د ایسنا اژانس راپور کاږي چې دغه متقاعد اسرائیلي جنرال اسحاق بريک، چې په اسرائیلو کې د غضب استازي”په نوم شهرت لري، زیاته کړې چې د دفاع وزیر یوف ګالانت هم حقیقت درک کول پیل کړي او په وينا یې که مذاکرات موافقې ته ونه رسېږي او ناکام شي، نو له امله به يې سیمه ايیزه جګړه پیل شي چې دا به د اسرائیلو لپاره لوی خطر وي.
راپور همدارنګه زياته کړې چې بريک په خپله مقاله کې وايي: زه ګومان کوم چې ګالانت اوس په دې پوه شوی چې جګړې خپل هدف له لاسه ورکړی دی، موږ د غزې په دلدل او ډنډ کې ډوب یو او خپل عسکر له لاسه ورکوو او په مقابل کې مو د جګړې اصلي هدف چې د حماس راپرځول دي هم نه دی ترلاسه کړی او فرصتونه مو هم له لاسه ورکړي.
راپور کې راغلي چې بريک په خپله مقاله کې په ټینګار سره وايي چې په سیاسي او پوځي سطحه ټولې لارې به اسرائیل د زوال په لور بيايي. او په وينا یې يوازې د لومړي وزیر بنیامین نتنیاهو او د هغه د افراطي ملګرو ګوښه کول ممکن اسرائیل له زوال او داسې برخليک څخه وژغوري چې په هغې کې بېرته راستنېدل نه وي.
اسرائيلي صهيونستي رژيم د غربي هېوادونو په پراخ ملاتړ د تېر کال اکتوبر له اوومې راهیسې په غزه کې وحشي جګړه پيل کړې ده، چې له امله یې تر ۱۳۳ زره تنه شهیدان او ټپیان شوي، چې زیاتره یې ماشومان او ښځې دي او تر ۱۰۰۰۰ زیات لادرکه دي، او د غزې اوسېدونکي د پراخې ویجاړۍ او مرګونې قحطۍ سره مخ دي.