یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د ملګرو ملتونو امنیت شوری په یوه خپاره کړي راپور کې ادعا کړې چې، په افغانستان د تېرو دریو میاشتو په جریان کې ۲۱۲۷ امنیتي پېښې رامنځته شوي دي.
د امنیت شوری په تازه راپور کې یادؤنه شوې چې په افغانستان کې د ۲۰۲۴ کال د می له ۱۴مې د جولای تر ۲۳مې پورې د نږدې درېیو میاشتو په لړ کې ۲۱۲۷ امنیتي پېښې شوي چې د ۲۰۲۳ کال د یادې مودې په پرتله ۵۳٪ سلنه لوړوالی ښيي.
راپور زیاتوي تېر کال په یاده موده کې ۳۷ وسله والې نښتې شوې وې چې سږ کال یې شمېر ۸۰ ته لوړ شوی دی؛ او همدارنګه د مقناطیسي ماینونو پېښې له ۷ څخه ۱۳ ته پورته شوې دي.
د امنیت شوری راپور وايي، د شر او فساد ډلو په کابل او شاوخوا سیمو کې پر طالبانو ۷۳ وسله وال بریدونه کړي او د داعش ډلې بریدونه هم زیات شوي دي، په دې راپور کې یې تر ډېره ګوت نیونه، په بامیانو کې د ګرځندویانو وژلو ته ده.
په داسې حال کې چې څو ورځې وړاندې د اسلام او وطن دښمنانو په دایکندي ولایت کې ۱۴ ملکي کسان ووژل او ۶ نور یې ټپیان کړل، مسؤلیت یې داعش خوارجو په غاړه واخیست.
راپور زیاتوي چې، په دې موده کې د اسلامي امارت مجاهدینو په کونړ، پکتیا او خوست ولایتونو کې له پاکستاني ځواکونو سره ۱۳ وسله والې نښتې کړې دي.
دا په داسې حال کې ده چې، اسلامي امارت په ټول هیواد کې د بشپړ امنیت د تأمین، افغانانو او بهرنیو هیوادونو ته ډاډ ورکوي او دا د اسلامي امارت لویه لاس ته راوړنه ګڼي. امنیت شوری په بار، بار د اسلامي امارت په خلاف برعکس راپورونه نشر کړي او په حقیقت یې پرده اچولې.
حقیقت خو دا دی چې اسلامي امارت په تېرو دریو کلنو کې چې د امنیت په برخه کې کوم کوټلي ګامونه پورته کړي، حتی قلم به یې په لیکلو عاجز پاتې شي، ورځ تر بلې هیواد کې د امنیت کړۍ مخ په ټینګېدو دي، مخالفې او ضد ډلې یې په شا تمبلولي، هیچا ته د ورانکاره فعالیتونو د ترسره کولو اجازه نه ورکوي او نه به یې ورکړي.
کله چې عوام له دولت او دولت له عوامو سره هماهنګه اوسي، هلته امنیتي پیښې نه شي ترسره کېدای، نو فلهذا امنیت شوری دې په خپل خپاره کړي راپور له سره غور وکړي او یا دې بښنه وغواړي.