د بلوڅ بېلتون پالې ډلې (BLA) اعلان کړی، چې د “دره بولان” په نوم عمليات یې په دوه برخو کې د سلګونه پاکستاني پوځيانو په وژلو سره بریالي پای ته رسېدلي دي.
د (BLA) په وينا، د عملياتو لومړۍ مرحله د ۲۰۲۴م کال په فبرورۍ کې د مچ ښار نیولو سره پای ته ورسېده او دویمه مرحله د ۲۰۲۵م کال په مارچ کې په جعفر ایکسپرېس اورګاډي باندې د برید په ترسره کولو سره پیل شوه او د یوې اوونۍ سختې جګړې وروسته پای ته ورسېده.
بلوڅ بېلتون پالو ويلي چې، په دې عملیاتو کې یې د پاکستاني پوځ ۳۵۴ سرتېري وژلي، له ۱۰۰ ډېر یې ټپیان کړي او ۲۱۴ تنه یې ژوندي نیولي، چې بیا د پاکستان له لوري د بندیانو تبادلې وړاندیز ردولو وروسته یې ټول وژلي دي.
همدا راز د معلوماتو له مخې، په دې عملیاتو کې ۱۳ بلوڅ سرمچاران هم وژل شوي دي.