د کډوالو دایمي مېشتېدنې او ځمکو وېش کمېټې د هېواد په شپږو ولایتونو کې بېرته راستنو شویو کډوالو ته پنځه زره او ۵۴۲ د هستوګنیځو ځمکو نمرې وېشلې دي.
د افغان حکومت مرستیال ویاند، ملا حمدالله فطرت د یادې کمېټې له قوله زیاته کړې، چې دغه نمرې په کونړ، لغمان، ننګرهار، کندوز، میدان وردګ او کندهار ولایتونو کې وېشل شوې دي.
د معلوماتو له مخې تر ټولو ډېرې دوه زره هستوګنيځې نمرې کندهار ولایت کې وېشل شوې.
یادې کمېټې ویلي، راستنو شویو کډوالو ته د ځمکو د وېش لړۍ په چټکۍ سره جریان لري.