د ترکیې د همکارۍ او همغږۍ اداره(ټیکا) وايي، د هرات له سیمهییز روغتون سره یې د ۵۵زره امریکايي ډالرو په ارزښت د طبي وسایلو او درملو مرسته کړې ده.
یادې ادارې ویلي، د هرات د سیمهییز روغتون د سرطان څانگې ته یې ۴۰ روغتیايي وسایل او تجهیزات ورکړي دي.
د ټیکا له لوري په خپره شوې خبرباپه کې ویل شوي، د سرطان له څانگې سره د ۴۰ طبي وسایلو ترڅنگ یې یوه اندازه درمل هم ورکړي دي.
په هرات کې د ترکیې جنرال کونسل سینان الهان ویلي، د ټیکا دغه مرسته به نه لومړۍ وي او نه هم وروستۍ او هیله لري چې یاده اداره به له افغانستان سره په بېلابېلو برخو کې مرستو ته دوام وکړي؛ ځکه په افغانستان کې د نورو برخو سربېره روغتیايي برخه هم مرستو ته اړتیا لري.
په هرات کې د ټیکا همغږي کوونکي عرفات دینیز بیا ویلي، دې ادارې د هرات د سیمهییز روغتون د سرطان څانگې ظرفیت له ۱۲ بسترونو څځه ۲۰ ته لوړ کړی او د سرطان اړوند ټول وسایل یې هم په واک کې ورکړي دي.
د هرات په سیمهییز روغتون کې د سرطان د تشخیص او درملنې څانگه له څه باندې څلورو کلونو راهیسې فعاله ده. د دغه روغتون د مسوولینو په وینا، په تېرو څلورو کلونو کې هلته د سرطان ۲۳۰۰ ناروغان تشخیص او تداوي شوي دي.
اوسمهال د هرات سربېره په کابل کې هم د سرطان د ناروغانو درملنه شونې شوې ده؛ خو افغانستان لا هم د سیمې په کچه دومره طبي وسایل، تجهیزات او د دې برخې متخصص ډاکټران نه لري چې د سرطان ناروغانو درملنه په بشپړ ډول په کور دننه وشي.