حماس غورځنګ په يوه خپره کړې اعلاميه کې د خپل يوه مشر عبدالرحمن شديد له قوله په فلسطيني وګړو غږ کړی، چې په بيت المقدس ښار کې د صهيونيستي رژيم محدوديتونه مات کړي او په الاقصی جومات کې د عبادت کولو لپاره په ښه لوړ شمېر سره راټول شي.
په اعلاميه کې ښاغلي شديد فلسطيني وګړو ته ويلي «موږ بايد د روژې مبارکې په مياشت کې د صهيونيستي رژيم د محدوديتونو په کيسه کې نه شو، د الاقصی جومات په لور خپل تګ او عبادت کول زيات کړو او په دې سره د ياد مبارک جومات مذهبي او تاريخي حق ادا کړو».
نوموړي زياته کړې چې، الاقصی جومات ته د نژدې اوسېدونکو ټولو فلسطيني وګړو مسؤليت جوړېږي چې د روژې په مبارکه مياشت کې د الاقصی جومات انګړ په خپل شتون سره ډک وساتي او د دفاع لپاره یې چمتو و اوسي.
د حماس غورځنګ په اعلاميه کې همدا راز راغلي چې، صهيونيستي اسرائيل د بيت المقدس د لاندې کولو لپاره په خپلو شومو موخو کې نشي کاميابيدلی، بلکې په دې سره لا هم په مسلمانانو کې د الاقصی د ساتنې جذبه پیاوړې کېږي.
دا په داسې حال کې ده چې تېره شپه په ياد جومات کې زرګونه فلسطيني وګړو د تراويح لمونځ ادا کړ.