د اوبو او انرژۍ وزارت وايي، په خوست کې په ټولیزه توگه د څهباندې ۱۸ مېلیونه افغانیو په ارزښت د چیکډیمو اته پروژې گټه اخیستنې ته سپارل شوې دي.
له یاد وزارت څخه په خپره شوې خبرپاڼه کې ویل شوي، د پرانیستې په مراسمو کې د اوبو او انرژۍ چارسمبالي وزیر عبدالطیف منصور، د کابل سیندیزې حوزې عمومي رئیس حبیب الرحمن حقپال، د خوست سیندیزې فرعي حوزې رئیس عبدالقیوم ثابت، د خوست سیمهییزو مسوولینو او ځايي خلکو گډون کړی و.: «په ټول هېواد کې د اسلامي نظام حاکمیت یو الهي نعمت دی. د افغانستان خلک باید د دغه نعمت قدر وکړي؛ ځکه چې د دغه نظام تر چتر لاندې هم امنیت او هم د اقتصادي پرمختگ زمینه چمتو شوې ده.»
په خبرپاڼه کې د ښاغلي منصور له قوله ویل شوي، په خوست کې ټولټال ۱۳ پروژې په پام کې نیول شوي، چې له هغې جملې څخه اته پروژې بشپړې شوې، دوې پروژې تر کار لاندې دي او درې نورې پروژې ډېزاین شوې او قرارداد ته چمتو دي.: «دغه پروژې په یاد ولایت کې د خاورې د ورستېدو د مخنیوي، د سېلابونو د خطرونو د کمولو، د باران اوبو د زېرمه کولو او د اوبو سرچینو د پیاوړتیا په موخه پلې کېږي.»
د یاد وزارت د معلوماتو پر بنسټ، د دغو اتو پروژو په پلې کېدو سره څه باندې ۵۳ زره متره مکعب اوبه زېرمه او همدارنگه، په مستقیمه توگه نږدې ۱۰ زره کسانو ته د کار زمینه چمتو شوې ده.