د اطلاعاتو او کلتور وزارت په یوه خبرپاڼه کې ویلي چې، د پنجشېر ولایت د اطلاعاتو او کلتور ریاست د ځوانانو چارو آمریت له وړیا ښوونیز مرکز څخه ۳۰۰ تنه ځوانان د کمپيوټر په برخه کې د درې میاشتنيو وړیا زده کړو تر بشپړولو وروسته د يو لړ مراسمو په ترڅ کې فارغ شوي.
د خبرپاڼې له مخې، د پنجشېر والي حافظ محمد آغا حکیم د فراغت مراسمو ته د وینا پر مهال ویلي، چې د لویديځ له لوري یرغل د ځوانانو افکار بې ګټو کارونو ته اړولي وو، خو د سرپرست حکومت له بیا راتګ سره د شریعت په چوکاټ کې د عصري زده کړو زمینه برابره شوې او ځوانان د نوې ټکنالوژۍ، اختراعاتو او اکتشافاتو زده کړې ته هڅول کېږي.
د پنجشېر ولایت د اطلاعاتو او کلتور رئیس مولوي نصرالله ملک زاده ویلي چې، د سرپرست حکومت له حاکمیت سره په دې ولایت کې د ځوانانو د زده کړې او تحصیل ښه فرصتونه برابر شوي، نوموړي له ځوانانو وغوښتل چې له دغو فرصتونو څخه ګټه واخلي.
بل خوا فارغ شویو ځوانانو د پنجشېر ولایت مقام او د اطلاعاتو او کلتور ریاست له مسؤلينو غوښتنه کړې، چې دغه ډول ښوونیزو پروګرامونو ته دې دوام ورکړي.