د کرنې وزارت وايي، د حکومت د مشرتابه د فرمان له مخې، د بزگرانو اضافي غنم پېرل کېږي او په سیلوگانو کې ساتل کېږي، څو په بیړنیو حالاتو کې یا که په بازار کې د غنمو او وړو بیه لوړه شي، دغه غنم به بېرته بازار ته وړاندې کېږي، څو د غنمو بیه ډېره لوړه نهشي.
د یاد وزارت څخه په خپره شوې خبرپاڼه کې ویل شوي، کندوز، تخار، بدخشان، هلمند، سمنگان، کندهار، هرات، فراه، بلخ، سرپل، فاریاب، نیمروز او بادغیس هغه ولایتونه دي چې اضافي غنم لري.
د هېواد په ۱۳ ولایتونو کې۳۸ زره او ۸۰۰ مټریک ټنه اضافي غنم شته، چې د اسلامي امارت لهخوا پېرل کېږي او د همدې ولایت یا زون په سیلوگانو کې زېرمه کېږي.
د خبرپاڼې له مخې، د کرنې وزارت له لوري یوه کمېټه گمارل شوې، چې د ریاست الوزرا د اقتصادي مرستیال، د مالیې وزارت، د غلو دانو د زېرمه کولو ریاست، د ترویج ریاست، مالي ریاست، د خصوصي سکتور ریاست، د اړوند ولایت د کرنې ریاست او د سرې میاشتې ټولنې استازي پکې شامل دي. دغه کمېټه دیاد پلان د پلي کولو مسوولیت لري.: «د بزگرانو اضافي غنم په سیلوگانو کې زېرمه کړي ترڅو په بازار کې د بیې د لوړوالي مخه ونیسي او په مناسب وخت کې یې بازار ته وړاندې کړي.»
که څه هم د افغانستان له نیمايي وگړو ډېر په کرنه او مالدارۍ بوخت دي، خو یاد بزگران د هېواد نیمايي اړتیا هم نهشي پوره کولای او افغانستان هر کال په زرگونه ټنه غنم له قزاقستان، تاجیکستان، هند، روسیې او پاکستان څخه واردوي او زموږ تولید شوي غنم زموږ اړتیاوې نهشي پوره کولی.