د روسیې د امنیت شوری منشي، سرګي شویګو روسۍ “راسیسکایا ګازیتا” ورځپاڼې ته په یوه مقاله کې لیکلي، د دې وخت رارسېدلی څو د افغانستان او شانګهای همکاریو سازمان ترمنځ اړیکې بیا ټینګې شي.
نوموړي زیاته کړې، چې مسکو او د یاد سازمان ډېر نور غړي د دې ګام پلوي دي.
سرګي شویګو په خپلې دې مقاله کې د داعش پر وړاندې د افغان حکومت بریالۍ مبارزه ستایلې او ټینګار یې کړی، چې که پر کابل د غرب بندیزونه نه وای؛ نو دا مبارزه به لا اغېزمنه وای.
هغه وړاندې په خپله مقاله کې کابل ته د لویدیځو ډیپلوماټانو وروستیو سفرونو ته په اشارې لیکلي، چې برېټانیا، جرمني او امریکا د افغانستان له حکومت سره د تعامل په هڅه کې دي.
د یادونې ده، چې تر دې وړاندې هم لوړ پوړو روسي چارواکو ویلي، چې مسکو د شانګهای سازمان او کابل ترمنځ د اړیکو د بیا پیل پلوی دی.