په دې وروستيو کې د پرځېدلي جمهوریت د ځینو کليدي غړو له غلا، چور او پرديو هېوادونو ته له جاسوسۍ څخه پرده پورته شوه، دغه موضوع د ډېری رسنیو سرټکی وګرځېده او پراخ بحثونه يې را وپارول؛ د شر او فساد ډلې مشران هم د جاسوسانو برخه وه.
په بهر کې یو شمېر رسنۍ د نړیوالو استخباراتي سازمانونو له ملاتړه برخمنې دي، د شر او فساد له خوا په محتوایي برخه کې حمایت کېږي او د دوی د شومو اهدافو د تحقق لپاره شپه او ورځ کار کوي، دوی چې کله د شر او فساد د سپینولو په مسئله کې له ناکامۍ سره مخ شول، له څو ورځو تېرېدلو وروسته یې د رسنیو د تسخیر، د سرټکي او لوري بدلولو په پار د افغان مؤمن او مجاهد ولس د شل کلنې سپیڅلې مبارزې، شجاعت او مېړانې پر وړاندې پراخ ناسم تبلیغات پیل کړل، د نړیوال زبرځواک پر وړاندې یې د افغان ولس مبارزه د روس نیابتي جګړه ونومول، په دغه سپېڅلي بهیر کې یې ټولې قربانۍ او ولسي مجاهدې پردیو ته منسوب کړې او د بدنامۍ هڅه یې وکړه.
په حقیقت کې دوی هغه څه هدف وګرځول، چې د افغان مؤمن او مجاهد ولس له مقدسو ارزښتونو سره یې تړاو درلود، بلکې دا قضیه یو بشپړ اُمت ته منسوبېږي؛ افغان ولس په دوه لسیزې جګړه کې له طالبانو سره تر څنګ ودرېد، د خپلو کورونو دروازې یې د هغوی پر مخ پرانیستې وې، په خورا ستړي مزل کې یې له دوی سره هر اړخیزه همکاري وکړه، د ځان او مال تر قربانۍ پورې چمتو و؛ دا هر څه تنها د مقدساتو پر بنسټ وو.
د شر او فساد ټولې رسنۍ د یو بشپړ ولس په قربانیو د ملنډو او تمسخر په ډول، د نورو په اشاره هڅه کوي، چې دوه لسیزې سپېڅلې مبارزې او د امریکا په شمول د هغوی د متحدینو ماتې ته بل رنګ ورکړي؛ دا هڅه یې نه لومړۍ او نه هم وروستۍ ده، دغه ډله د پردیو په دستور همېش له مقدساتو سره په لومړۍ کرښه کې جنګېږي او په وړاندې یې مبارزه کوي.
افغان مؤمن او مجاهد ولس له طالبانو سره په شل کلنه مبارزه کې مستقیم همکار و، ولس ښه درک کړې ده چې نیابتي جنګیالي څوک وو او څوک د چا لپاره وجنګېدل!؟ د شر او فساد لارویان د څو پیسو لپاره، د تېر په څېر د واقعیتونو تسخیر او د مقدساتو د بې ارزښته کولو لپاره هڅه او کار کوي، خو دغه هڅه یې ځکه ناکامه ده، چې د طالبانو مبارزه ولس شموله وه، له پوره ولسي ملاتړه برخمنه وه، همدې ولس کور، ځای، اوبه، ډوډۍ او ټول امکانات ورته برابرول.
د ناټو او امریکا په وړاندې په شل کلنه جګړه کې طالبانو ګڼ شمېر اسلحې، ټانګونو، نظامي وسایل او وسایط هم نیول؛ همدا وسایل او وسایط د شل کلنې جګړې پر مهال د مبارزې ښکاره ابزار وو، نه د سیمې هېوادونو طالبانو ته د پیسو د ورکولو لپاره زړه ښه کاوه او نه هم طالبانو دغه پیسو ته اړتیا لرل، ځکه چې جګړه له اوله ولسي وه او همدا ولسي ملاتړ یې کافي و.
د شر او فساد رسنۍ ټول وخت له مقدساتو سره مبارزه کوي، د افغان ولس د عقیدوي او فکري انحراف په موخه تېر اېستونکي تبلیغات کوي، دغه ډله د خپلو نا مشروع اهدافو لپاره هر کله په ټولیزو او ټولنیزو رسنیو کې د مقدساتو په شمول له ټولو حدودو تېری او په وړاندې یې مبارزه کوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.