وحیدالدین حیدر
د شر و فساد لکۍ ګانې د بل په اخور واریږي، دوی خپله هیڅ هم نه دي حتی ا ا ورته د رقیب او سیال په سترګه هم نګوري، د دوی زور د مچ نه دی خو لګیږي په مخ.
د افغانستان بدخواهانو چې دلته د ماتې تراخه وڅکل زموږ په وړاندې یې د دریدلو مجال له لاسه ورکړ او زموږ له جغرافیې ناکامه او نامراده ستانه شول، د خپلو شرمونو د پټولو لپاره یې د بغاوت واړه واړه دلګۍ ایجاد کړل، که یو غږ پورته کړي، د غرب له لاسپیکرونو یې غږونه بدرګه کیږي، که مظلومه واقع شي بیا یې د مظلومیت چیغې هم له دې لاسپیکرونو وځي، موږ پښتانه وایوو چې خوسی په میخ واریږي.نو دا خلک د بل بابا د باروتو په زور غور او پش کوي نور هیڅ خبره نشته، چې څوک سر جیګوي خپل د سر خیر دې غواړي.
د مشروع انتقاد او مشورو دروازې خلاصې دي، د نیوکو پراخه سینه موجوده ده، موږ چې خپل قاتلان زغملی شو نو انتقاد نشو زغملی؟دا نظام دی، یو لوی حکومت دی او د حکومتدارۍ یوه سلسله موجوده ده، سمه ده چې امکانات به محدود وي او تقاضاګانې به ډیرې وي، زموږ خدمات به ډېر پراخ او معیاري نه وي خو موږ ټولو ستونزو ته غاړې وتي یوو او سرخ رویه به ترې راووځو.
خو نړۍ راته لنګته اچوي، پښو ته مو کاڼي ګوزاروي ترڅو زموږ سرعت متوقفه کړي، هغوی پوهیږي چې د افغانستان جیوپولیټیک موقیعت په داسې ځای کې دی، که د پرمختګ مجال پیدا کړي دا به د نړۍ په مارکیټ واوړي.افغانستان د مرکزي آسیا تر منځ اقتصادي څلور لارې دی خو د دغې څلور لارې مخه ډبه شوې، موږ په ټول توان اخته یوو چې وطن د پردیو له تکیې را وباسوو.
نړۍ زموږ په لستوڼو کې داسې ماران تربیه کړي چې حتی د افغانیت نوم راسره نه مني، زه به یې کور جوړوم دا به راته متعصب او فاشست وايي، زه به یې سړک، روغتون، ښوونځی او پوهنتون رغوم دا به مې په کاڼو ولي.اخر ولې او ترکومه؟څوک چې نظام څملوي، وطن نسکوروي هغوی ملي خاینان دي او د خاینانو فیصلې دې بیا نظامي محاکم وکړي، نه ملکي محکمې.
موږ نیوکې زغموو، موږ انتقاد زغموو، خو وطن ته د خون او خرابې منصوبې، پروژې او دسیسې نه زغموو.چې ټوپک پورته کوي دغسې اقدامات بې ځوابه نه پاتې کیږي، د شر د لکۍ ګانو باداران به بیا په دې وطن د خرمستیو خوب ګور ته یوسي.
خو بیا هم هغوی چې د بهرنیانو د پیسو په تمه ناست دي، ترڅو به په دې وطن کې یو ناتار ساز کړي، دوی ته وایوو چې په ځان او په بچیو مو رحم وکړئ.څوک چې دا وطن او دا ولس نه بښي، د بښلو نه دي، امنیتي ادارې دا ظرفیت لري چې هره نقطه کې هر بغاوت نسکور او سرکوبه کړي.