د عراق دولتي رسمي رسنۍ ( واع) د عراق د صدراعظم او د پوځ عمومي قوماندان محمد شیاع السوداني له قوله خبر ورکړی چې د عراق لپاره د داعشیانو والي له ٨ نورو مهمو مشرانو سره وژل شوی.
د يادې رسنۍ د خبر پربنسټ السوداني په خپل ايکس يا پخواني ټويټر اکونټ پيغام کې ليکلي دي: د داعش ترهګرې ډلې تش په نامه والي او د دغه سازمان اته تنه جګپوړي مشران د عراق په شمال د حمرين غرونو په پټنځايونو کې د ترهګرۍ سره د مبارزې او د ملي امنيت د ادارې په ګډو عملياتو کې وژل شوي، او د دې سترې بريا مبارکي ټول عراقي ولس ته وايو.
د يادونې وړ ده چې په وروستيو څو مياشتو کې د عراق په ګډون په ترکيه ايران او افغانستان کې هم د داعش ډلې مهم غړي له منځه وړل شوي او يا هم نيول شوي دي.