لیڪوال: اېمل پښتون
د بایډن وروستۍ څرګندونې او اعترافات چې افغانستان يې د امپراطوریو هدیره وباله، دا د ټولې نړۍ له وضعیت څخه د اخیستي فکر نچوړ و. دا د لوېدلي حیثیت انځور او د لودیځ بلاک د نړېدو پیلامه وه.
امریکا په نړۍ کې په چټکۍ سره بدلېدونکو حالاتو ته په رڼو سترګو ګوري او له بېلابېلو هېوادونو څخه خپلې نظامي اډې باسي، بلکې په تدریج سره د غرب د امپراطورۍ ټغر مخ په ټولېدو دی.افغانستان هغه خطرناک ډنډ دی، چې له لویدونکو څخه ځاني او مالي قوتونه دواړه زبیښي او له امپراطوریو څخه نړیوال حيثيت تراشي.
د روس، چین او ځینې نورو سیمه ییزو هېوادنو د غرب سره له بېباکه چلند څخه له ورایه مالومېږي، چې د نړۍ بل قطب راټوکېدلی او نړۍ یو ځل بیا په دوه قطبونو وېشل شوې ده.
د تور لېست او بندیزونو له چوکاټه د افغانستان پښه تر عربي هېوادونو پورې اوړي، د نږدې ګاونډ هېوادونه له بندیزونو سره، سره هر نوع تعامل په خلاص مټ سره کوي، د دوی پر نړۍ چلېدونکی واک نور بې واکه شوی دی او دا د غرب د امپراطورۍ وروستۍ سلګۍ دي.
د افغانستان له نوي حکومت سره د تعاملاتو نوې او چټکه څپه خورا ګړندۍ پر مخ روانه ده، په نړۍ کې په چټکۍ سره بدلیدونکو حالاتو زمونږ د سیمې هیوادونه دې نتیجې ته رسولي، چې د سیمې د ثبات لپاره د افغانستان ثبات او ورسره دوستانه او ښې اړیکې خورا اړینې او حیاتي دي.
اسلامي امارت په درېو کلونو کې له نه رسمیت او بندیزونو سربېره، د جمهوریت له شلو کلونو څخه څو چنده چټک او ډېر مخکې تللی دی.
په نږدې سیمه او ګاونډ کې بل داسې هېواد نشته، چې په یو وار ګڼ شمېر وزیران په رسمي بلنو څو بېلابېلو هېوادونو ته په سفر تللي وي او د نړۍ د یو فعاله او ریښتیني ځواک په حيث د ورسره چلند وشي، له اسلامي امارت سره د اړیکو په جوړولو کې هېوادونه دې ته هم آماده دي، چې د غرب له بندیزونو پښه واړوي.
نور به تور لېست په ټوله نړۍ کې تور لېست نه وي.
دا هغه توپیر دی، چې په افغانستان کې د ناټو او امریکا له ماتې وروسته یې نړۍ تجربه کوي.افغانستان د امپراطوریو هدیره بلل، هسې تصادف مه ګڼئ.