د مقاومت جبهې په نامه د رامنځته شوي خیالي او فسبوکي غورځنګ مدعیان د څلور کلونو په تېرېدو سره لاهم په دې نه دي توانېدلي چې په افغانستان کې د سرپرست حکومت په وړاندې د مقاومت لپاره په خپل منځ کې سره منسجم او د نړیوالو او سیمیزو هیوادونو باور ترلاسه کړي. د یادې جبهې وروستۍ هیلې چې تمه کېده ډونالډ ټرمپ به یې لاسنیوی وکړي له روانو تحولاتو او د ټرمپ ادارې له سیاست تر دې دمه په اوبو لاهو جوتیږي.
یاده فسبوکي جبهه د سرپرست حکومت لهخوا د کابل له نیولو وروسته په اګست د ٢٠٢١ م کال کې رامنځته شوه چې تر دې دمه له یوې خوا د جبهې د مشر د کورنۍ لهخوا د ډلې پر واک د نیواک او له بلې خوا د فساد له ننګونو سره لاس او ګرېوان ده.
که څه هم وخت ناوخت یاده خیالي جبهه د هیواد په یو شمېر ولایاتو او پلازمینه کابل کې د سرپرست حکومت پر کارکوونکو د بریدونو افواهات خپروي او له هیواد بېرون بهرنۍ رسنۍ لکه آمو، هشت صبح، زاویه، آزادۍ او انټرنېشنل بیا همدې بې بنسټه خبرونو ته په لوړه کچه انعکاس ورکوي خو سره له دې بیا هم د نړۍ په کچه او په کور دننه هېڅ سیمییز او ولسي ملاتړ نه لري.
امریکا، اورپایي اتحادیه او د سیمې هیوادونه پر دې باور دي چې د مقاومت په نامه دا ډله نه ده توانېدلې چې د افغانستان د سیاسي راتلونکي په تړاو یوه مشترکه اجماع رامنځ ته کړي او یا هم په افغانستان کې د سرپرست حکومت په وړاندې د مقاومت توان ولري؛ دغه راز افغانان هم د یادې جبهې فعالیت بې ګټې او د هیواد د تجزیې په معنا بولي.
د تېر پرځېدلي جمهوري حکومت یو شمېر چارواکي او سیاسیون هم په دې اند دي چې د احمد شاه مسعود د زوی احمد مسعود په مشرۍ د اسلامي امارت په وړاندې د مقاومت خبرې هسې د خلکو تېر ایستل او له دې لارې د نړیوالو استخباراتي سازمانونو لهخوا خپلو جیبونو ته کار کول دي. اسلامي امارت بیا د یادې جبهې مقاومت فسبوکي او ټویټري یادوي او ټولې ادعاوې یې درواغ او تش افواهات ګڼي.
شنونکي د مقاومت جهبې د ماتې یو اساسي لامل د دوی حضوري او فزیکي نهشتون په ګوته کوي. د دوی په وینا د مقاومت جبهه په هیواد کې یوه لوېشت ځمکه هم تر خپل تسلط لاندې نه لري او نه هم تر اوسه توانېدلي دي ترڅو په کور دننه افغانانو او نړیوالو ته خپل فزیکي حضور څرګند کړي.
په داسې حال کې چې د فزیکي حضور نهشتون او پر ځمکه کنټرول نه لرل د هر مقاومت لپاره یو لوی چیلنج دی. که یوه جبهه مشخصه سیمه ونه لري، نو نه یواځې د هغوی لپاره نظامي عملیات پېچلي وي، بلکې په نړیواله کچه یې سیاسي اعتبار هم په هېڅ حسابیږي. د یوه مؤثر مقاومت لپاره، جغرافیهیي تسلط، منظمه رهبري، مالي سرچینې او ولسي ملاتړ اړین دي، هغه څه چې د مقاومت په نامه جبهه یو هم نه لري.
څه موده وړاندې د یادې جبهې ویاند له بي بي سي سره په یو مرکه کې د خپلو پراخو بریدونو خبرداری ورکړی وو خو د څو میاشتو په تېرېدو سره بیا هم نه دي توانېدلي چې د سرپرست حکومت په وړاندې خپلو بریدونو ته دوام ورکړي. د دې ترڅنګ یاده جبهه تر دې دمه د هیواد په یوه لوېشت ځمکه هم تسلط نه لري.