د پاکستاني طالبانو غورځنګ د یوې اعلامیې په خپرولو سره ویلي چې، پاکستاني پوځي شرکتونو ته یې ورکړل شوی مهلت پایته رسېدلی او مشرتابه یې پرېکړه کړې چې له دې وروسته به یوازې امنیتي ادارې او کاروونکي نه، بلکې د پاکستاني پوځ تجارتي او اقتصادي ادارې هم تر برید لاندې نیول کېږي، تر څو له اقتصادي اړخه کمزوري «او د دوی شر پای ومومي.»
پاکستاني طالبانو غورځنګ ویلي، تر دې وړاندې یې دوکاندارانو ته دوه میاشتې مهلت ورکړل شوی و، چې پهخپلو دوکانونه کې موجود د پوځ اړوند تولیدات وپلوري او پرځای یې نور متبادل مال واخلي، څو له مالي زیان څخه خوندي شي.
اعلامیه کې وړاندې د پاکستاني طالبانو د مشرتابه له قوله د دغه غورځنګ ځواکونو ته امر شوی چې له دې وروسته د پوځ اړوند تولیدات چې هر چېرته وي، وسوځوي یا په هره بله ممکنه لاره چې وي، لهمنځه يوسي. «همداراز هغه موټرونه او وسایط چې دا توکي انتقالوي، هم وسوځوي.»
یاد غورځنګ د اعلامیې په پای کې، اېن اېل سي NLC، اېف ډبليو او، فوجي سیمنټ، عسکري بانک، فوجي فرټیلائزر کمپنی (FFC)، عسکري سیمنټ، پاکستان آرډیننس فیکټري (POF)، فوجي فاونډیشن، فوجي فوډز، عسکري فیولز، او DHA پوځي شرکتونه د بېلګې په ډول یاد کړي دي.