د پنجشېر ولايت مقام رسنيز دفتر خبر ورکړی چې په پرځېدلي جمهوريت کې د پنجشېر د ولایتي شوری رئیس عطا محمد امیري هېواد ته راستون شوی دی او د پنجشېر له والي سره یې کتلي دي.
د سرچينې په خبره، د پنجشېر والي له نوموړي سره کتنه کې ویلي، د سرپرست حکومت د مشرتابه د عمومي عفوې د فرمان له مخ بهر کې مېشت ټول افغانان کولی شي هېواد ته رستانه او خپل عادي ژوند ته دوام ورکړي.
د پنجشېر والي حافظ محمد اغا حکيم له عطا محمد اميري سره په کتنه کې همدا راز ډاډ ورکړی چې د ټول هېواد په څېر پنجشېر هم له بشپړ امنيت او ټولنيز ثبات څخه برخمن دی او په وينا یې د حکومت غېږه د هر چا پر مخ خلاصه ده او بهر ته تللي ټول افغانان کولای شي وطن ته راستانه شي.
همدا راز د پرځېدلي جمهوريت پر مهال د پنجشېر د ولايتي شوری رئيس ويلي خوشبختانه هغه تبلیغات چې په بهر کې د هېواد په تېره بيا د پنجشېر په اړه کېږي هېڅ سم نه دي او په وينا یې دی له نژدې ويني چې په پنجشېر کې هېڅ ډول ستونزه نشته او خلک یې امن او هوسا ژوند تېروي.