د بهرنیو چارو وزارت په ستوري ماڼۍ کې د افغانستان او چین د ډیپلوماټیکو اړیکو د اویایمې کلیزې په مناسبت غونډه ترسره شوې.
د یاد وزارت د ویاند مرستیال حافظ ضیاء احمد تکل په یوه خبرپاڼه کې ویلي، چې په دې غونډه کې د بهرنیو چارو وزارت سیاسي مرستیال شیر محمد عباس ستانکزي، د چین ولسي جمهوریت سفیر ژاو شینګ، ډیپلوماتانو، د بهرنیو چارو وزارت رئیسانو، د پوهنتون استادانو، محصلینو او افغان او چینايي سوداګرو ګډون درلود.
د خبرپاڼې له مخې په دې غونډه کې د افغانستان او چین ترمنځ د ډیپلوماتیکو اړیکو پر کچې، اهمیت او تېرو شویو جریاناتو خبرې شوي او په اوږد مهاله توګه د دواړو هېوادونو ترمنځ د سیاسي، اقتصادي او سوداګریزو همکاریو پر زیاتوالي او د اړیکو پر لا پیاوړتیا خبرې شوې دي.
یاده دې وي، چې پر هېواد اسلامي امارت له بیا ځل واکمنېدو وروسته چين له افغانستان سره په بېلابېلو برخو کې نږدې اړیکي لرلې دي.