د اسرائیلي رژيم دفاع وزارت په تازه خپرو کړيو ارقامو کې ویلي، چې د ۲۰۲۳ کال د اکتوبر له ۷مې راهیسې د غزې جګړه کې د دې رژيم تر ۲۰ زرو ډېر پوځيان ټپیان شوي دي.
د معلوماتو له مخې په ټپي شويو ۲۰ زره اسرائيلي پوځيانو کې له نیمایي ډېر یې اوس له سختو رواني ستونزو کړېږي او د جګړې کولو توان او تمرکز یې له لاسه ورکړی دی.
د اسرائيلي رژيم دفاع وزارت زیاته کړې، چې نږدې ۴۵ سلنه پوځيان فزیکي ژور ټپونه لري او ۲۰ سلنه نور بيا له دواړو رواني او فزیکي ستونزو سره لاس او ګرېوان دي.
په خپرو کړو معلوماتو کې همدا راز ويل شوي، چې ۹۹ پوځيانو د بدن غړو له پرې کېدو وروسته مصنوعي غړو ته اړتیا درلوده، ۱۶ په بشپړ ډول فلج شوي، ۵۶ سلنه د ډېر معلولیت لرونکو په توګه ډلبندي شوي او ۲۴ پوځيان بیا په بشپړ ډول معلول بلل شوي دي.
په معلوماتو کې د اسرائیلي رژيم د پوځيانو د ځان وژنې ارقام نه دي خپاره شوي؛ خو د نړيوالو رسنيو او بنسټونو د راپورونو له مخې له غزې جګړې څخه اسرائيل ته ستنېدونکي ډېری پوځيان د ځان وژنې په اړه فکر کوي او ځينو خو یې ځانوژنه کړې هم ده.
د اسرائيل دفاع وزارت دا شمېرې داسې مهال خپروي، چې د غزې جګړه کې د دوی له لوري د خپلو تلفاتو خپرېدونکې شمېرې په لوړه کچه سانسور کېږي او دوی ته اوښتی ځاني او مالي زيان له نيمايي هم کم بيانوي.