روزگان کې د اسټرالیايي عسکرو د جنگي جنایتونو څېړنه کېږي

د روزگان والي عنایت الله شجاع وايي، د اسټرالیا د جنگي جنایتونو خبریالې او متخصصې ټاکټر مېشل جاسمین سره یې لیدلي او په دغه ولایت کې یې د اسټرالیايي عسکرو د جنگي جنایتونو د څېړنو غوښتنه ورنه کړې ده.
د روزگان له ولایت مقام څخه په خپره شوې خبرپاڼه کې ویل شوي، ټاکټر مېشل جاسمین د خپل سفر په اړه معلومات له والي سره شریک کړي، چې د سفر موخه یې په دغه ولایت کې د امریکايي او اسټرالیايي یرغلگرو عسکرو له لوري د شوو وحشتونو څېړنه ده.
په خبرپاڼه کې د ښاغلي شجاع له قوله ویل شوي، چې د روزگان ځايي اداره له نوموړې سره هر راز همکارۍ ته چمتو ده.:« د شل کلن یرغل پر مهال د یرغلگرو عسکرو له لوري په زرگونه بې‌گناه وگړي چې ښځې او ماشومان هم پکې وو، شهیدان شوي، نو پکار ده چې رڼه څېړنه یې وشي.»
د روزگان والي له اسټرالیايي خبریالې غوښتي، چې د افغانستان روښانه او مثبت انځور نړۍ ته وړاندې کړي او نړۍ دې هم افغانستان د دې هېواد د دُښمنانونو له عینکو نه گوري او د افغانستان رښتینی حقیقت دې درک کړي.
د امریکايي یرغل پر مهال د هېواد په ټولو ولایتونو کې د امریکايي، اسټرالیايي، برېتانوي، کاناډايي، جرمني او نورو یرغلگرو عسکرو له لوري زرگونه جنگي جنایتونه شوي دي؛ خو له بده‌مرغه تر اوسه دغه جنگي جنایتونه پټ پاتې شوي او څېړل شوي نه دي.