د افغانستان ستره محکمه وايي، په سرپُل کې یې ۶۳ تنو ته چې ۱۵یې ښځې وې او په بېلابېلو جرمونو تورن وو، تعزیرې سزا ورکړې ده.
له سترې محکمې څخه په خپره شوې خبرپاڼه کې ویل شوي، یاد کسان په لواطت، زنا، غلا، اخلاقي فساد، بېحرمتۍ، له کوره تېښته و نورو جرمونو تورن وو، چې د سرپُل مرکزي ستډیوم کې ورته تعزیري سزا ورکړل شوه.
په خبرپاڼه کې ویل شوي، له درې گونو محکمو د پرېکړې وروسته هر یو ته د ۳۹ دُرو وهلو سزا ورکړل شوې ده.
د سرپُل د مرافعه محکمې عمومي رئیس یار محمد عمري ویلي، په تورنو کسانو د سزاوو پلې کول د جرمونو په کمولو کې لویه ونډه لري او دغه ډول سزاوې یې د نورو اصلاح بللې ده.
د سترې محکمې له لوري نږدې هره اوونۍ د هېواد په بېلابېلو ولایتونو کې مجرمینو ته په عام محضر کې تعزیرې سزاوې ورکول کېږي.