د پرځېدلي جمهوریت یو جنرال سمیع سادات چې د طالبانو لخوا د کابل تر نیول کېدو وړاندې د ځانګړو ځواکونو قومندان و، د امریکایانو له خاصو همکارانو څخه و، خو کله چې نوموړي وغوښتل په وروستیو کې د کابل ساتنه وکړي، بهرنیو دوستانو یې باور پرې بایللی و.
سمیع سادات د تېرو دریو کلونو را په دېخوا امریکا کې اوسېږي او د را ټولیدنې لپاره یې یو دفتر هم پرانیستی، یاد دفتر ته ځینې وخت د امریکایي پوځ متقاعد جنرالان هم ورځي، خو سادات او ټیم یې په ځلونو غوښتنې ترې کړي چې د نظامي جګړې له لارې بیا ځل افغانستان تسخیر کړي، مګر تر دې مهاله د بایللي باور په اعاده نه دی توانېدلی.
د سمیع سادات یو تازه مهم غږیز کلیپ رسنیز شوی؛ نوموړی یاد کلیپ کې سناتور مایک والټز، چې د ټرمپ لخوا د امریکا د ملي امنیت د سلاکار په توګه ټاکل شوی دی، د مبارکۍ پیغام تر څنګ له نوموړي هیله څرګنده کړې چې د افغانستان په بیا نیولو کې همکاري ورسره وکړي.
دا د سمیع سادات د لومړنۍ غوښتنې په توګه نه ده، ځکه چې نوموړي په ځلونو د بایډن له حکومته هم د بیا ځل باور ترلاسه کولو غوښتنې کړې وې، خو دا ځل یې ټرمپ ته د نږدې کېدو هڅې پیل کړي، مګر اوس یې غږیز کلیپ هم رسنیز شوی دی.
نوموړي په افغانستان کې د امریکایي اشغال پر مهال د جګړې میدان ځکه په هلمند او نورو ولایتونو کې ګرم ساته، چې بې شماره لوژستیکي قراردادونه یې کړي وو او له همدې لارې یې پیسې پیدا کولې.
سمیع سادات د امریکا تر څنګ، د اسلام له سرسخت دښمن او د بشریت له جنایتکار اسرائیلي رژیم څخه هم پر افغانستان د یوې بلي جګړې د تپلو غوښتنې لري او غواړي له جګړو تازه خلاص شوی افغانستان د غزې په ډول کنډواله کړي.
اسرائیلي رژیم سره د بغاوتګرو پټي نږدې اړیکې هغه مهال لا څرګندې شوې، چې تازه د دوی له لارې په افغانستان کې یوازینی پاتي یهودي هم د دوی په مرسته تر اسرائیلو ورسېد.
بغاوتګر هغه شریر عناصر دي چې د اسلامي نظام د دښمنۍ لپاره د یهودو غېږ ته هم پناه وړي، له هغوی په پټو او ښکاره اړیکو کې د هر اړخیز تمویل غوښتنه کوي، څو افغانستان کې هم دجالي موخې تطبیق شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.