د صنعت او سوداگرۍ وزارت وايي، د روان ۲۰۲۴ز کال په نیمايي کې افغانستان د نړۍ له بېلابېلو هېوادونو سره د ۵مېلیارده او ۲۳۷ مېلیونه ډالرو په ارزښت راکړه ورکړه کړې ده.
د یاد وزارت ویاند عبدالسلام جواد ویلي، د منځنۍ اسیا سره د افغانستان سوداگریزه راکړه ورکړه د روان کال په لومړیو شپږو میاشتو کې ۶۲۹مېلیونه ډالر صادرات او واردات شوي، چې ۵۸ مېلیونه صادرات او ۵۷۱مېلیونه ډالرو په ارزښت واردات شوي دي.
د جواد په خبره، د منځنۍ اسیا هېوادونو سربېره د افغانستان سوداگریزه راکړه ورکړه له نورو هېوادونو سره هم روانه ده، چې گڼ توکي له پاکستان، ایران، متحده عربي اماراتو، ترکیې او ازبېکستان څخه صادر او واردېږي.
د هېواد په صادراتو کې ډېره برخه کې وچې او تازه مېوې، کاني ډبرې، قیمتي او نیمه قیمتي ډبرې، زعفران او طبي بوټي دي؛ خو افغانستان د ژوند د اړتیا وړ ټول توکي له نورې نړۍ اخلي.
د اقتصادي چارو کارپوهان وايي، که د هېواد په صادراتو او وارداتو کې همدا ناانډولي روانه وي، نو د افغانستان د اقتصاد د ژر رغېدو هیلې کمې دي. پکار ده چې افغانستان په نورو برخو کې هم صادرات ولري او یوازې په تازه او وچې مېوې او طبي بوټو بسنه ونه شي.
د افغانستان ډېره سوداگریزه راکړه ورکړه له پاکستان سره ده؛ خو پاکستان هرکله د افغانستان د کرنیزو محصولاتو او مېوو پر مهال د افغانستان سوداگرو پر وړاندې خنډونه جوړوي، چې له امله یې هر کال افغان سوداگر مېلیونونه ډالر زیان ویني.
پاکستان تېره اوونۍ په گڼو افغاني کرنیزو محصولاتو گمرکي مالیې لوړې کړي، چې له امله یې په تورخم او سپینبولدک کې زرگونه موټر بند پاتې دي او سوداگرو ته د گټې پر ځای تاوان کوي.