لیکوال: ببرک هیوادمل
د ترکیې حکومت د خون اشامه او خونخوار او د جنبش ګوند پورې مربوط قومندان ګل محمد پهلوان له ترکیې ډیپورټ کړی، زما په اند د طالب دپلوماسۍ ډېره پخه ده، دوی کورنی سیاست داسې مدیریت کوي چې په دا دریو کلونو کې یې په وړاندې هیڅ وسلوالې ډلې د سر پورته کولو جرائت نه دی کړی او په دا وروستیو کې یې له هېواده بهر خپل سیاسي او نظامي مخالفین هم مهار کړي چې ښه بېلګه یې د دوستم د ملېشو د اخراج لړۍ ده.
دا یواځې ترکیه نه ده چې د اسلامي امارت سیاسي او نظامي مخالفین راټولېدو او سیاسي مجلسونو ته نه پرېږدي او کرار کرار یې له خپلو هېوادونو پسې اخلي؛ تازه تاجکستان هم د شر او فساد جوړوونکو ته خبرداری ورکړی چې له تاجکستان څخه ځانونه راټول کړي.
د نستوه نادري په نوم یو لیکوال په خپل فیسبوکپاڼې د طنز په ډول لیکلي: (تاجکستان تر کمپلې لاندې مقاومتیانو ته ویلي چې خپل بار او بسترې در وتړﺉ لخېره).
په ایران کې هم د دوی په وړاندې حکومت خپل اقدامات سخت کړي، موده وړاندې د مقاومت د جبهې اړوند یو شاعر چې نجیب بارور نومېږي، د ایران د مذهبي مشر په دربار کې چاپلوسانه شعرونه وویل او په خپل شعر کې یې د ایران مذهبي مشر و ننګاوه چې پنجشیر او باګرام د لرغوني ایران د قلمرو برخه ده، خراسان د ایران برخه ده، بخارا او کابل د اصفهان مربوطه ځمکه ده.
خو د ده د چاپلوسانه شعرونو ویلو پر مهال د مذهبي مشر تندی تروی شو او سکوت یې په قهر او غضب مات شو، نوموړي شاعر ته یې وویل: شعرونه خیالونه دي، نه ځمکني واقعیتونه؛ تاسې ځمکني واقیعتونه وګورﺉ د نړۍ هېوادونه په ټاکل شویو پولو ویشل شوي او د هر هېواد په قلمرو کې بیلابیل ملتونه ژوند کوي.
د ایران مذهبي مشر یاد شعر دومره بې آبه کړ چې بیا به نوموړی داسې د وطن مفتې قبالې چاته په شعرونو کې نه ورکوي.
د وطن د بدخواهانو ځای د دنیا په هیڅ ځای کې نشته، دوی چې هره دروازه ټکولې هغه دروازه یې پر مخ تړل شوې او نا مراده ترې ستانه شوي.
رښتیا خبره دا ده چې دا ډله خلک غله دي او دا متل یو واقیعت باندې بدل شو چې وایي د غله په غره کې هم ځای نشته.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.