نن ورځ افغانستان ته یو ځانکړي امریکایي پلاوي سفر کړی دی، یاد پلاوي کې د نورو ډیپلوماټانو ترڅنګ د بنديانو په چارو کې د امريکا متحده ايالاتو د ولسمشر ځانګړی استازی او ورسره د افغانستان لپاره د امریکا پخوانی ځانګړی استازی زلمی خليلزاد دی، دوی په کابل کې د بهرنیو چارو وزارت له سرپرست مولوي امیر خان متقي سره لیدنه کړې ده.
د یاد امریکایي پلاوي سفر او د یو امریکایي وکړي جورج ګلزمن خوشې کېدل له افغانستان سره په ډیپلوماټیکه برخه کې د مهم پرمختګ او تعاملاتو پر ډیرېدو اطلاق کولای شو، ځکه چې امریکا ته د افغانستان د روانو حالاتو په اړه، د سرپرست حکومت د مخالفو ډلو له خوا ناسم معلومات ارایه کېږي او همېشه یادو ډلو هڅه کړې چې امریکا، غرب او نړۍواله ټولنې په دې قانع کړي چې په افغانستان کې روان وضعیت د دوی په خلاف روان دی او سرپرست حکومت د تعاملاتو لپاره اقدامات نه کوي.
خو په افغانستان کې واقعي حالات او د سرپرست حکومت ډیپلوماسي د ټولو مخالفو ډلو د وړاندوینو، راپورونو او تبلیغاتو برخلاف ښې خوا ته روان دي. دا سفر او د یوه مهم بندي خوشي کېدل خپله د مخالفینو ټولو تبلیغاتو ته د حال په ژبه ځواب دی، چې ګواکې په افغانستان کې امن دی، ډیپلوماټیکي اړیکې د پرمختګ په حال کې دي او مهم فصل ته داخلې شوې دي.
د سرپرست حکومت بهرنۍ بې طرفه او متوازنه پالیسي تر دې مهاله مهمې لاسته راوړنې لري، چې له جملې یې د امریکایي پلاوي وروستی سفر هم بللی شو.
دا چې د امریکایي پلاوي سفر په ځانګړې توګه بندیانو د مسئلې په اړه و، پر مهال یې د افغانستان او امریکا پر دوه اړخيزو اړيکو، د بنديانو په خلاصون او په امريکا کې افغانانو ته د کونسلي خدماتو د وړاندې کولو په اړه هم خبرې شوې دي.
مهمه ده چې د دواړو هېوادونو اړوند مسائلو ته د خبرو له لارې حل پیدا شي او امریکایي پلاوی د افغانستان روان حالات له نږدې وګوري او ټولې اندیښنې یې رفعه شي.
د بنديانو په چارو کې د امريکا د ولسمشر ځانګړي استازي اډم بوايلر د افغانستان او امريکا ترمنځ د بنديانو په برخه کې پرمختګ د باور جوړونې پر لور ښه ګام بللی او په افغانستان کې یې د مخدره توکو پر وړاندې مبارزه او د امنيت د ټينګښت پر لورې اقدامات ستایلي دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.