د شر او فساد جبهې غواړي چې د امریکا جنګي پروژې او د سیمې د بې ثباتۍ قرارداد ورته ورکړل شي؛ د شر خوښوونکو جبهو ستراتیژیک اهداف د جګړو اور لګول او د نفاق تخم شیندل دي.
په اوویایمو کلونو کې هغه مهال چې د کورنۍ جګړو د اور لمبې په غرغړاندو وې دوی ددې لمبو تاو ته ځانونه ګرمول/تاودول.
د شر او فساد ډلې ټپلې خپله بقا یواځې په جګړو، خون او خرابۍ کې ګوري، ځکه دا د احمدشاه مسعود عمق ستراتیژي وه چې هغه پروژوي جګړې واردې کړي چې هغه په دې برخه کې ډېر بریالی هم و.
مسعود تنکی ځوان و چې د داودخان جمهوریت یې و ننګاوه، ورپسې د امریکا ستراتيژیک ملګری شو، د سي آی اِې قراردادي جنګونه یې ټېکه کړل؛ کله چې د ډاکټر نجیب حکومت نسکور شو او له روسانو سره افغان جهاد پای ته ورسېده، په مسعود ډالر بند شول نو بیا یې هم له خون خرابې لاس وانخیست.
د مسعود او مسعود خیلو په جرمي اقتصاد د دوی کورنۍ تغذیه کېدلې او پرته له جګړو یې سیاسي او نظامي موقف ختمېده، نو ځکه یې د حکمتیار، وحدت ګوند، محاذ او طالبانو له تحریک سره جګړې او ایتلافونه وکړل.
پاتې دې نه وي چې یواځې طالبان ورسره په کوم ايتلاف کې ورګډ نه شول او د طالبانو داعیه د شر او فساد ختمول وو او ترڅنګ یې پاټکونه او قومندان بازۍ محوه کول وو چې د شر او فساد په ضد ټول ملت له طالبانو سره ودرېدل؛ د شر ډلې او لښکرې یې له وطنه وشړلې او د دوی په شړلو د تنظیمي خرمستیو جنازه ووتله.
په ملت او وطن کې کراره کراري شوه؛ غلا، فساد، قتل او جګړې ختمې شوې؛ د جنګ جنرالانو په پېښور، ایران او تاجکستان کې د جنګي پروژو د ترلاسه کولو په موخه شپې سبا کولې مګر د خدای فضل وو او د افغان ولس قربانۍ وې چې دلته یې یو حاکم مرکزي نظام و نه شو ننګولی.
دا چې تېره تجربه بیا تکرار شوه طالبان راغلل فساد، اسارت او جنګونه ختم شول، د احمدشاه مسعود کورنۍ چې د جنګي پروژو د راوړلو تخم یې کور کې کرل شوی، غواړي چې بیا دې وطن ته د جنګ سکروټې را وشیندي، نو له امریکا یې غوښتي چې د طالبانو په ځای له دوی سره تعامل وکړي.
تېره ورځ چې د امریکې د ولسمشر ډونالډ ټرمپ د بریا اعلان وشو نو د شر او فساد جبهې ویاند علي میثم نظري له ټرمپ وغوښتل ترڅو د بغاوت له جبهې سره تعامل وکړي او یو ځل بیا واک یوې وړې ولسوالۍ ته ولېږدول شي.
د بغاوت/مقاومت جبهه د قدرت او پیسو حرص لري، دوی عقیده نه پېژني، دوی ان له خپلو سره تربګنۍ لري، سره له دې چې د بغاوت جبهې د طالبانو مخالفت ته موزې پښو کړي خو په عین حال کې د ازادۍ په نوم د شر او فساد له بلې جبهې سره هم ښکر په ښکر دي.
دوی جنګ نه ګټي، بلکې د جنګ په دوامداره ساتلو کې خپلې ګټې لټوي چې د دوی دا لوېدلی فکر او باور د وطن لپاره څه چې د انسانیت لپاره او د سیمې د ناکرارۍ لپاره زهر دی.
موږ د سیمې له هېوادونو غواړو چې ماران په نستوڼو کې ونه ساتي چې بالاخره به له همدې نستوڼو وخوړل شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.