د اوبو او انرژۍ وزارت په یوه خبرپاڼه کې ویلي چې، د دغه وزارت د سرپرست، د لوګر ولایتي مسئولینو او د ځایي خلکو په شتون کې د سرخاب بند د ساتنې او پاملرنې پروژه او د دوو چکډمونو پروژې ګټې اخیستنې ته سپارل شوې دي.
د خبرپاڼې له مخې، د اوبو او انرژۍ وزارت سرپرست ملا عبداللطیف منصور د یادو پروژو د پرانیستې په مراسمو کې د وینا پر مهال د سرخاب بند ارزښت د محمد آغې ولسوالي د خلکو لپاره حیاتي بللی او د دغه بند د ساتنې او پاملرنې پروژې بشپړېدل یې ارزښتناکه لاسته راوړنه بللې.
ښاغلي منصور د خبرو پر دوام ټینګار کړی، چې د سرپرست حکومت مسئولین د هېواد د آبادۍ لپاره شپه او ورځ هڅې کوي او په تېرو دریو کلونو کې يې د هېواد د آبادۍ او پراختیا په موخه په بېلابېلو برخو کې ډېرې پروژې پلې کړې دي.
د یادونې وړ ده، چې د سرخاب بند د ساتنې او پاملرنې پروژه د ۱۱ میلیونه افغانیو په لګښت د اوبو او انرژي وزارت له لوري پلي شوې ده.