د مخابراتو وزارت مسئولین وايي د مخابراتو او معولوماتي ټکنالوژۍ وزارت د ولس له غوښتنې سره سم د غږیزو اړیکو او انټرنټ د قېمتونو موضوع په خپلو لومړيتوبونو کې نیولې، په همدې اساس د هیواد په کچه د دوهم ځل لپاره د مخابراتي شبکو لپاره د اړيکو انټرنټ نوې ټيټې بيې اعلانوي.
د مخابراتو وزارت وايي د مخابراتي شرکتونو لپاره د بیو په نوي سقف کې د مخابراتي شبکو تر منځ د خپلمنځي نښلونې فیس ۰.۵۰ افغانۍ ټاکل شوی، چې د تېر په پرتله پکې ۵۰ سلنه کموالی راغلی دی.
دغه راز له یوې شبکې څخه بلې شبکې ته د پېرودونکو ترمنځ د یوې دقیقې غږیزې اړیکې بیه ۱.۴۰ افغانۍ ټاکل شوې، چې د بیو د تېر سقف په پرتله ۳۶ سلنه ټیټوالی پکې راغلی دی، په همدې ډول د یو جي بي میاشتنۍ انټرنټي کڅوړې بیه ۹۵ افغانۍ ټاکل شوې، چې د تېر په نسبت پکې ۱۴ سلنه ټیټوالی راغلی دی.
د مخابراتو وزارت مسئولین همداراز زياتوي چې د مخابراتي شرکتونو لپاره په نويو بيو کې د هرې شبکې دننه د پېرودونکو ترمنځ د یوه لیکلي پیغام بیه ۱.۳۰ افغانۍ او له یوې شبکې څخه بلې ته ۱.۴۰ افغانۍ ټاکل شوې چې په ترتیب سره د مخکیني سقف په نسبت ۶۸ او ۶۰ سلنه ټیټوالی پکې راغلی دی.
د يادونې وړ ده چې مخابراتو وزارت وايي د نوي سقف پورتنۍ بیې به، یوه نیمه میاشت وروسته، یعنې د راتلونکي میلادي کال له پیل څخه عملي شي.