د افغان حکومت مرستیال ویاند، ملا حمدالله فطرت د تېر یوه کال پر مهال په بېلابېلو برخو په ځانګړي ډول امنیت، زیربناوو او ټولنیزو برخو کې د افغان حکومت لاستهراوړنې په ډاګه کړې.
ښاغلي فطرت ویلي، چې په یاده موده کې ۱۰۰ زره او ۳۰۰ پولیس په امنیتي، جنايي، سرحدي، لوجیستیکی او نورو برخو کې له روزنې فارغ شوي او د ملي دفاع وزارت د روزل شویو پوځي ځواکونو شمېر ۱۸۱ زره او ۸۴ تنو ته رسېدلی دی.
مرستیال ویاند زیاته کړې، چې تېر کال په افغانستان کې ۹ لوی بندونه ځینې تکمیل شوي او ځینې تر کار لاندې نیول شوي او ۳۴۱ چکډيمونه جوړ شوي دي چې د اوبو د کنټرول او مدیریت په برخه کې مهم رول ولوبوي.
ملا حمد الله فطرت دا هم ویلي، چې تېر کال په هېواد کې د ۳۵ زره او ۲۲۸ تنه روږدو درملنه شوې او عادي ژوند ته را ګرځيدلي دي.
په خبره یې، په لویو ښارونو کې ۱۰ زره او ۶۶۴ تنه سوالګر راټول او تثبیت شوي او بیا هر یوه ته میاشتنۍ مرسته مقرره شوې ده.