د افغانستان په بهرنیو چارو وزارت کې باوري سرچینو رسنیو ته تائید کړې چې، د ناروې حکومت هوکړه کړې چې په اوسلو کې د افغانستان سفارت سرپرست حکومت ته وسپاري.
سرچینو وړاندې هغه راپورونه چې ګواکې د ناروې حکومت د «لومړي سکرتر» په توګه د سرپرست حکومت ډیپلوماټ منلی، هم رښتیا بللي او ټینګار یې کړی چې د افغانستان سفارت به په راتلونکو څو ورځو کې پرانیستل شي.
د معلوماتو له مخې، په اوسلو کې د افغانستان سفارت د ۲۰۲۴ کال په سپټمبر میاشت کې وتړل شو او د څارنې چارې یې د دغه سفارت یوه پخواني کارکوونکي ته چې د سرپرست حکومت د تائید وړ و، سپارل شوی و.