نيويارک ټايمز رسنۍ په يوه راپور کې ليکلي چې د هند تر کنټرول لاندې کشمير کې په سيلانيانو د تېرې اوونۍ تر بريد را وروسته د هند لومړي وزیر نریندرا مودي له لسګونو نړیوالو مشرانو سره په ټیلیفون خبرې کړې دي او پر دې سربېره د هند پلازمېنې نوي ډهلي کې د شاوخوا سل هېوادونو د سفارتونو استازي د هند بهرنیو چارو وزارت ته د معلوماتو اخیستو لپاره ورغلي دي.
سرچينې ليکلي چې دا هڅې زیاتره د دې لپاره نه دي چې د هند او پاکستان ترمنځ د خطرناکې نښتې مخه ونیسي؛ بلکې، د دې لپاره دي چې نوی ډهلي هڅه کوي نړیوالو ته قناعت ورکړي څو د خپل ګاونډي هېواد پاکستان پر وړاندې پوځي اقدامات ترسره کړي.
د کشمير له بريد را وروسته چې هند پکې پاکستان په لاس لرلو تورن کړی د دواړو هېوادونو تر منځ د اړيکو ترينګلتيا او بې ثباتي تر بل هر وخت ډېره شوې او د دواړو هېوادونو د سرحدي ځواکونو ترمنځ له تېرو څو شپو راهیسې وخت نا وخت د سپکو وسلو ډزې هم تبادله شوې دي.
پر دې سربېره په کشمیر کې هندي ځواکونو پراخ عملیات پیل کړي، چې تر اوسه یې سلګونه کسان نیولي، او لا هم د برید کوونکو د موندلو هڅې روانې دي.