د ریاست الوزراء اقتصادي مرستیال ملا عبدالغني برادر پرون په هرات کې د پاشدان بند د پاتې چارو پرانیسته وکړه.
د پرانیستې په دغو مراسمو کې د ریاستالوزراء اقتصادي مرستیال ملا عبدالغني وویل، د تېرو دوو لسیزو پر مهال د هېواد اشغال، جگړې، سیاسي او اقتصادي بېثباتي او د اقلیمي بدلون له امله اوښتي زیانونه هغه لاملونه یاد کړل، چې له امله یې افغانستان له ډېرو ټولنیزو او اقتصادي ستونزو سره مخ کړی.
نوموړي وویل، اسلامي امارت د هېواد د ځان بساینې، ټولنیز او اقتصادي پرمختگ لپاره د نورو برخو ترڅنگ د طبیعي سرچینو د مدیریت لپاره قوي هوډ او د عمل نیت لري.: «اسلامي امارت د هېواد په کچه د ټولو هغو بندونو ارزونه کړې چې کارونه یې نیمگړي پاتې وو. د یادو بندونو د پاتې چارو بشپړولو لپاره جامع کاري پلانونه جوړ شوي چې له مخې یې د ډېرو بندونو عملي چارې پیل شوې دي. د دغو بندونو له جملې یې یو هم د پاشدان بند دی، چې عملاً یې کار پيل شو.»
ښاغلي برادر وویل، د پاشدان بند پروژه د هرات لپاره مهمه او حیاتي ده او د هرات ولسونو ته یې ډاډ ورکړ، چې اسلامي امارت په ټول توان د یادې پروژې بشپړولو ته ژمن دی او هڅه کوي چې په وخت او ښه کیفیت سره یې کارونه بشپړ کړي.:«اسلامي امارت به ټولې هغه پروژې پيل کړي، چې د دوی اقتصادي ستونزې پرې حل کېدای شي.»
د پرانیستې په دغو مراسمو کې د اوبو او انرژۍ وزیر ملا عبدالطیف منصور وویل، د پاشدان په بند کې لسگونه افغاني او بهرني انجینران کار کوي.: «اسلامي امارت خلکو ته امنیت تامین کړی دی او د معیشت د تامین لپاره په مختلفو ولایتونو کې لویې، متوسطې او کوچنۍ پروژې په کار اچولي دي.
په راتلونکې کې به د اوبو او انرژي وزارت په هرات او نورو ولایتونو کې نورې پروژې هم افتتاح کړي.»د پاشدان بند د هرات ولایت په کروخ ولسوالۍ کې واقع دی او اوبه یې د هریرود سیند ته ور گډېږي.
دغه بند ۱۱۶۷ متره اوږدوالی او ۴۲ متره لوړوالی لري چې په بشپړېدو سره به ۵۴ مېلیونه متر مکعب اوبه ذخیره او ۲۰۰ مېلیونه متر مکعب باراني اوبه به مدیریت کړي.د پاشدان بند د چارو په پیلېدو سره به ۴۰۰ نفرو ته کار پیدا شي، ۱۳۰۰۰ هیکتاره ځمکه به خړوبه او ۲ مېگاواټه برېښنا به تولید کړي.
د سېلابونو اوبه به مدیریت او د هرات ولایت ټولې شمالي سیمې به خړوبې کړي.په یاد بند ۱۱۷ مېلیونه امریکايي ډالر لگښت راځي.