د پنجشېر ولایتي چارواکو ویلي، چې یو شمېر هندي پانګهوال د دې ولایت کانونو کې د پانګونې لپاره لېواله دي.
د پنجشېر ولایت مقام ویاند سیف الدین لټون رسنیو سره په خبرو کې ویلي، هندي سوداګر چې د قېمتي ډبرو برخه کې فعالیت لري، د پنجشېر سرپرست والي حافظ محمد آغا حکیم سره کتنه کې ویلي، نور هندي شرکتونه به هم افغانستان کې پانګونې ته وهڅوي.
دغو سوداګرو د پنجشېر کانونو د پانګونې طرحه د پنجشېر والي ته وړاندې کړې، والي د هندي سوداګرو د طرحې هرکلی کړی او هغوی ته یې ډاډ ورکړی، چې د ولایت مقام کورنیو او بهرنیو پانګوالو سره هر ډول مرستې ته چمتو دی.
ياده دې وي چې، واک ته د سرپرست حکومت له رسېدو وروسته د پنجشېر کانونه په بشپړ ډول قانوني او مسلکي استخراج کېږي او عوايد یې د دولت خزانې ته جمعه کېږي.