د صنعت او سوداګرۍ وزارت خبر ورکړی، چې د دغه وزارت سرپرست نورالدین عزیزي، په هېواد کې د جلغوزي سکتور له سوداګرو سره کتلي دي.
د مالوماتو له مخې؛ په دې کتنه کې د جلغوزيو د سوداګرو ستونزې شریکې شوي او د جلغوزيو د پروسس فابریکو پر جوړولو ټینګار شوی دی.
دغه راز د جلغوزيو پر صادراتو، د دغه سکتور پر ملاتړ او په هېواد کې د جلغوزیو مارکېټ پر جوړولو بحث شوی دی.
د صنعت او سوداګرۍ وزارت سرپرست د جلغوزي سکتور د سوداګرو د خبرو په اورېدو سره؛ له هغوی څخه د بشپړ ملاتړ ډاډ ورکړی او ویلي یې دي چې د دغه سکتور د سوداګرو ترمنځ ناسالم رقابت به ډېر ژر پای ته ورسېږي او ټول سوداګر به په واحده اتحادیه کې سره راټول شي.
د یادولو وړ ده چې دا مهال د افغانستان جلغوزي چین، هند او یو شمېر اروپایي هېوادونو ته صادرېږي.