په تېره شل کلنه دوره کې د شر او فساد غړي د پیسو عاشقان وو او لا هم دي، طبعي ده چې عاشقان د معشوقو لپاره قربانۍ ته چمتو وي، دا چې په شر او فساد جبهه/بغاوتګرو کې خپلمنځي اختلافات رامنځته شوي، اصلي لامل یې دپیسو تر لاسه کول دي.
د خیالي جبهو د ډلو ټپلو ترمنځ د پیسو پر سر حالات دومره ترینګلي شوي چې، د دوې ترمنځ د یوه او بلې ډلې محرم رازونه یې افشا کړل، حتی ګوتڅنډنې یې سره کړي.
د شر او فساد خیالي جبهې د ټلوالې په نوم پر دې مظلومو او بې چاره افغان ولسونو بې نهایته ظلمونه وکړل، د همدې مظلومو افغانانو ازار او ښېراوې دي چې د خپلمنځي اختلافاتو له امله د زوال پر لور ګړندي ګامونه پورته کوي.
د معلوماتو پر بنا، د نړېدلي جمهوري نظام لومړی مرستیال امرالله صالح، جنرال ایوب سالنګي، بهاوالدین جیلاني او ظاهر اغبر چې د لنډ غرو/شر او فساد جبهې مهم او کلیدي غړي بلل کېدل، تازه یې د شر او فساد له جبهې لار جلا کړې.
یادو څلور تنو د روندسبز/زرغون بهیر په اډانه کې د یو بلې خیالي جبهې د جوړېدو تابیا نېولې چې، لومړني توافقات یې سره، ترسره شوي دي.
روند سبز/زرغون بهیر د امرالله صالح هغه حرکت دی چې، د اسلامي امارت پر وړاندې یو شمېر جعلي، ضد او نقیص اسناد خپروي، په بې بنسټه تبلیغاتو له بهرنیو ډونرانو پیسې/مالي فنډ ترلاسه کوي.
د سرچینو په وینا، امرالله صالح له ګاونډي هیواد تاجکستان سره ډېرې نږدې اړیکې لري چې، ډېری وخت هملته هستوګن وي.
د اسلامي امارت په بیا واکمنېدو سره په دې درې کلنه دوره کې له هیواد بهر یو شمېر سیاسي او خیالي جبهې جوړې شوې، ترڅو د اسلامي او شرعي نظام خلافو هیوادونو ملاتړ ترلاسه کړي؛ خوشبختانه چې تردې دمه یوه خیالي جبهه په دې نه ده توانېدلې چې افغانستان ته راستنه شي او په فعالیت پیل وکړي.
د امرالله صالح په ګډون کومو لنډغرو چې، د شر او فساد له جبهې لار جلا کړې، اصلي موخې یې دا دي چې په هیواد کې د تخریبي او ورانکاره فعالیتونو په ترسراوي یوځل بیا خپل جیبونه له ډالرو ډک کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.