امریکایي او اسرائیلي چارواکي د قطر، مصر او امریکا په منځګړیتوب په غزه کې د اوربند او د روژې په میاشت کې د بندیانو د تبادلې په اړه د موافقې په موخه هڅې زیاتې کړي دي.
د امریکا د بهرنیو چارو وزارت وایي، چې د روژې په میاشت کې په بیت المقدس او د اردن رود “کرانه باختري” سیمه کې د خرابېدونکي امنیتي وضعیت په اړه اندېښنې زیاتې شوي دي.
د امریکا د بهرنیو چارو وزارت د اندیښنو سره همهاله یو شمېر رسنیو راپورونه ورکړي، چې په لسګونو زره فلسطینیان د رمضان میاشتې په جریان کې د الاقصی جومات ته د ننوتلو له محدودیتونو سره مخ دي، خو د دې میاشتې په جریان کې جومات ته د ننوتلو هڅې کوي.
دا اندیښنې داسې مهال راپورته کېږي، چې مصري او قطري منځګړو د 40 ورځو اوربند وړاندیز او د 40 اسرائیلي بندیانو د خوشې کولو لپاره هڅې زیاتې کړیدي.
“اکسیوس” خبري اژانس د یوه اسرائیلي چارواکي له قوله ویلي، چې د (CIA) مشر “ویلیم برنز” د جمعې په ورځ په اردن کې د اسرائیلو استخباراتي ادارې “موساد” له مشر “ډیویډ بارني” سره پټه ناسته درلوده او دواړو لورو په غزه کې د اوربند د پلي کولو او د بندیانو د تبادلې په اړه خبرې کړیدي.
بل لور ته د حماس یوه لوړ پوړي چارواکي د تېرې پنجشنبې په ورځ ویلي و، چې پلاوی یې د مصر له پلازمینې “قاهرې” څخه وتلی، ځکه چې د اسرائیلو لومړنی غبرګون لږ و او دا د حماس تر ټولو کوچنۍ غوښتنې هم نه پوره کوي.
حماس ویلي و، چې په غزه کې به د اوربند خبرې راتلونکې اونۍ بیا پیل شي او امکان نه لري، چې له روژې مخکې یوې موافقې ته ورسیږي.
اسرائیلي چارواکي وایي، چې له ۱۲۵ څخه زیات اسرائيلان د حماس لخوا برمته شوي او د دوی لخوا ساتل کیږی، خو بله خوا بیا ۸۸۰۰ فلسطیني بندیان د اسرائیلو په زندانونو کې شپې او ورځې تېروي.