د کابل د شکر درې ولسوالۍ یوه اوسېدونکي چې ټول قرانکریم یې په ۸۵ ورځو کې حفظ کړی د کابل ولايت د والي له لوري ستايل شوی.
د کابل ولایت مقام په يوه خبرپاڼه کې ويلي چې د دې لوړ استعداد څښتن حافظ عبدالحق نومېږي چې د دیني زده کړو تر څنګ عصري زده کړې هم کوي او د لسم ټولګي زده کونکی دی.
د کابل والي ملا امین الله عبید د دغه ځوان لپاره ستاینغونډه جوړه کړې وه چې د دیني علماوو سربېره پکې د هغه د کورنۍ غړو هم ګډون کړی وو.
د خبرپاڼې پر بنسټ ښاغلي عبيد دغه حافظ ته د هر ډول امکاناتو برابرولو ډاډ ورکړی او هغه ته یې د لا زیاتو علومو د حاصلولو سپارښته کړې ده.