د کانونو او پټرولیم وزارت وايي، چې تېر کال یې د ۳۶ لویو او وړو کانونو تړونونه لاسلیک کړي دي چې مالي ارزښت يې ۱.۳ میلیارده امریکايي ډالرو ته رسېږي.
د ياد وزارت ویاند همایون افغان وايي، چې د دې کانونو له جملې څخه ۱۰ لوی کانونه چې مالي ارزښت یې ۳۸۰ میلیونه ډالرو ته رسېږي او پاتې نور ۲۵ کوچني کانونه دي چې ډيری یې افغان پانګهوالو ته په قرارداد ورکړل شوي، چې مالي حجم یې دوه میلیارده افغانیو ته رسېږي.
دوی زیاتوي، چې په دې کانونو کې د سمنټو، مالګې او مرمر ډبرو پروژې شاملې دي.
د کانونو وزارت د مسوولینو په وینا دا تړونونه له کورنیو او بهرنیو شرکتونو سره شوي دي.